Андижон вилоятида 9 миллиард сўмлик 49 турдаги дори-дармон захираси яратилган. Шу сабабли дори тақчиллиги кузатилмайди. Бу ҳақда Андижон вилояти ҳокими Шуҳрат Абдураҳмоновнинг вилоят аҳолисига қилган мурожаатида маълум қилинди, дея хабар берди «Дарё» мухбири Умиджон Мамарасулов.
«Пандемиянинг 2020 йил 16 мартдан эълон қилинган дастлабки босқичида ёппасига чекловлар жорий қилиниши, қатъий назорат ўрнатилгани касалланиш борасида юқори статистика қайд этилмаслигига олиб келганди. Бугунги кунда эса вазият оғирлашди. Шунинг учун биз янги шароитда яшашга кўникишимиз зарур, негаки вирус қачон барҳам топишини ҳеч ким тахмин қилолмайди. Касалликка қарши дори воситаси ҳам ихтиро қилинмаган. Афсуски, сўнгги 15 кунда вазият кескинлашди. Ижтимоий тармоқларда турли асосланмаган хабарлар, ҳақиқатга тўғри келмайдиган маълумотлар тарқатилиши натижасида аҳоли ўртасида гап-сўзлар кўпайди. Ўринсиз ваҳимали шов-шувлар тарқалди. Мен барчани мана шундай оғир кунларда бир бўлиб, ҳамжиҳат бўлиб ишлашга чақираман», — деди вилоят раҳбари Шуҳрат Абдураҳмонов.
Вилоят ҳокими ижтимоий тармоқларда тарқалган ва кўпчиликни қизиқтирган саволга ҳам жавоб берди.
Дори воситалари тақчиллиги юзага келди, деган ноўрин хабарларга вилоят ҳокими – вилоят штаби раҳбари сифатида қуйидагича жавоб бермоқчиман: Соғлиқни сақлаш тизими мутахассисларининг коронавирус билан боғлиқ касалликларни даволаш учун талаб этиладиган рўйхатига 49 турдаги дори-дармон ва тиббиёт жиҳозлари киритилган. Шундан 32 таси дори-дармон. Андижонда бугун мана шу вирус билан боғлиқ 49 турдаги дори-дармонлар бўйича ҳеч қандай муаммо, етишмовчилик бўлмайди. Ҳозирги кунга қадар, 9 миллиард сўмдан ортиқ маблағ ҳисобига коронавирус билан касалланган тўрт мингта беморни даволаш имкониятига эга бўлган уч ойлик дори-дармон захираси яратилган.Ҳоким ўз мурожаатида ОАВ ходимларига ҳам турли ваҳимали хабарларни тарқатмаслик илтимоси билан чиқди.Шуҳрат Абдураҳмонов, Андижон вилояти ҳокими
«Барча оммавий ахборот воситалари ходимлари ҳамда блогерлардан бир нарсани илтимос қиламан, бугунги оғир вазиятда турли асосланмаган хабарларни тарқатиб, одамларимизни ваҳимага қўйманглар. Ҳақиқатга тўғри келмайдиган маълумотлар тарқатилиши натижасида аҳоли ўртасида гап-сўзлар кўпаймоқда. Қандай саволингиз бўлса, мана менга мурожаат қилинг, 24 соат давомида жавоб беришга ваъда бераман. Қаердадир муаммо бўлаётган бўлса, айтинг ўша вақтнинг ўзида биргаликда ҳал қиламиз. Мен барчани мана шундай оғир кунларда бир бўлиб, ҳамжиҳат бўлиб ишлашни чақираман», — деди Андижон ҳокими.
Изоҳ (0)