Андижон вилоятидаги дорихоналарга иситма ва нафас йўллари хасталигига қарши дори сўраб мурожаат қилганлар тўғрисидаги маълумотлар ёзиб олинади ҳамда улар тиббиёт муассасалари томонидан назоратга олинади. Бу ҳақда 20 июль, душанба куни вилоят ҳокими Шуҳрат Абдураҳмонов иштирокидаги брифингда маълум қилинди, дея хабар берди «Дарё» мухбири.
Қайд этилишича, вилоятда бугунги кунда 1245 та дорихона фаолият юритади. Уларнинг барчаси 49 турдаги зарур дорилар билан таъминланган.
«Айни пайтда вилоят бўйича 1245 та дорихона мавжуд. Шуларни ҳисобга олиб, вирус тарқалиши динамикасининг ҳисобини юритиш учун бир қатор чоралар кўрилди. Биз ҳудудимизда ишлаб келаётган барча дорихона эгаларига ‘Агар дорихонангизга кимдир иситма ва томоқ оғриғига дори сўраб келса, у фуқаронинг паспорти бўлса маълумотлари, телефон рақамларини ёзиб олиб, рўйхат қилиб беринг. Шу йўл билан фуқароларни назоратга олиб, унда касаллик бор ёки йўқлигини аниқлаймиз’, деб мурожаат қилдик. Иситма асосан кечки пайт кузатилади. Бундай ҳолларда аҳоли ўз ҳудудида яшовчи врач ёки ҳамширага мурожаат қилади. Шунингдек, маълумотлар маҳалла раислари орқали ҳам жамланади», — деди Шуҳрат Абдураҳмонов.
Вилоят раҳбарининг таъкидлашича, вилоятдаги барча дорихона раҳбарлари масъул ташкилотлар томонидан огоҳлантирилган.
«Вилоят прокуратураси ва унинг қошидаги департамент орқали дорихона раҳбарларини огоҳлантиряпмиз. Аввало дорихона ходимлари дори-дармон нархини сунъий оширса ёки шу касаллик билан мурожаат қилган кишининг маълумотини бермаса, бу ҳолатда ‘вилоятимизда вирус билан зарарланишнинг кўпайишига ҳисса қўшган ёки яширган’, деган хулоса билан жавобгарликка тортилади ва унинг фаолият юритиши учун берилган гувоҳномаси бекор қилинади», — деди вилоят ҳокими.
Ҳокимнинг маълум қилишича, вилоятда дори-дармон нархи ўрганилган ва Андижон шаҳридаги «Мансурбек», «Асл фарм», «Фаррух фарм» каби саккизта МЧЖга қарашли дорихоналарда нархлар сунъий равишда ошириб юборилгани аниқланган.
«Биз ишчи гуруҳ тузиб, дорихоналардаги ҳолатни текширдик. Афсуски, бир неча сотувчиларимиз энг керакли дорилар нархини сунъий равишда оширгани аниқланди ва дорихона гувоҳномаси бекор қилинмоқда. Сабаби, охирги пайтда кўп фуқароларимиз иситма қилиб, томоғи оғриса, оддий касаллик деган тахмин билан 3-4 кун давомида дорихонадан олган иситма дориларини ичяпти. Дори таъсир қилмаяпти. Мана шундай вазиятларда беморни даволаш қийин кечмоқда. Шунингдек, эътиборсизлик оқибатида бошқалар билан қилинган мулоқотлар натижасида касалликнинг ортиши ҳам кузатилмоқда», — деди Андижон вилоят ҳокими.
Шуҳрат Абдураҳмоновнинг қўшимча қилишича, зарур воситаларга бўлган эҳтиёж тўлиқ қопланиши учун вилоятда фаолият кўрсатаётган «Макрофарм» ва «Гранд фарм» корхоналарида зарур миқдордаги дори воситалари захираси яратилган.
Эслатиб ўтамиз, аввалроқ Андижонда 9 миллард сўмлик дори-дармон захираси яратилгани хабар берилганди.
Изоҳ (0)