Саудия Арабистони подшоҳи шифохонага ётқизилди

Саудия Арабистони подшоҳи Салмон бин Абдулазиз ас-Сауд Ар-Риёддаги шифохонага ётқизилди. Бу ҳақда мамлакат матбуот агентлиги хабар берди.

Маълумотларга кўра, подшоҳ ўт пуфагининг яллиғланиши туфайли тиббий кўрикдан ўтказилади.

Маълумот учун, подшоҳ Салмон 84 ёшда. У 1953 йили, 18 ёшга тўлганида подшоҳ вакили ва Ар-Риёд амири этиб тайинланган. Орадан ўн йил ўтгач Салом Ар-Риёд вилояти губернаторига айланган ва 2011 йилга қадар ушбу лавозимда фаолият юритган. Бу давр оралиғида у Ар-Риёд шаҳри ривожланган, шаҳар аҳолиси 150 минг кишидан миллион кишига қадар (1980 йил) етган. Ҳозирда Саудия Арабистони пойтахтида 7 миллиондан ортиқ аҳоли истиқомат қилиб келади.

2011 йилда Салмон бин Абдулазиз ас-Сауд мудофаа вазири лавозимига тайинланган, шунингдек, Миллий хавфсизлик кенгаши таркибидан ўрин олган. Бир йилдан камроқ вақт ичида — 2012 йилнинг июнида у меросхўр шаҳзода ва бош вазир ўринбосарига айланган.

Салмон бин Абдулазиз ас-Сауд 2015 йилнинг январида подшоҳ Абдулла вафот этгач, тахтга келган.

Сўнгги маълумотларга кўра, Саудия Арабистонида коронавирусга чалинганлар сони 250 минг кишидан, вирус қурбонлари сони 2,4 минг кишидан ошган.