«Коронавирусга чалинганларнинг барчасини даволаш имконияти бор, десак, катта хато бўлади» — Нурмат Отабеков

2020 йилнинг 20 июль куни Халқаро пресс-клубнинг коронавирусга қарши кураш ва пандемия даврида аҳолини қўллаб-қувватлаш бўйича амалга оширилаётган чора-тадбирлар муҳокамасига бағишланган навбатдаги сессияси бўлиб ўтди. Бу ҳақда «Дарё» мухбири хабар бермоқда.

Сессияда қатнашган Санитария-эпидемиология назорати давлат инспекцияси бошлиғи Нурмат Отабековнинг айтишича, коронавирусга қарши курашда халқ асосий иштирокчига айлансагина, уни енгиш мумкин.

«Ўзбекистон аҳолисининг барчаси ёппасига тест топширадиган бўлса, ПЗР аппаратлари бир ёқда турсин, умуман, тиббиётни таназзулга учратишимиз мумкин. Олдинги карантин вақтида кунига 3 мингта таҳлил ўтказар эдик. Ҳозир эса бир суткада 30 мингга яқин таҳлил ўтказиляпти. Бундан кўриниб турибдики, агар ҳаммамиз шу каби ихтиёр билдирадиган бўлсак, текширишга муҳтож аҳолини қийин аҳволга солиб қўямиз.

Шунинг учун эндиликда шифохонага ётқизишдан олдин таҳлил натижаларига эмас, рентген, яъни мультиспирал компьютер томограф натижаларига аҳамият қаратиш ва ўпкадаги муаммоларнинг бошланиш пайтида даволашни йўлга қўйиш мақсад қилинган.

Ўйлайманки, биз ўзимизга ўзимиз хулоса чиқардик. Агар бу касалликка чалинганларнинг барчасини даволаш имконияти бор, дейдиган бўлсак, катта хато бўлади. Бу мураккаб масала. Коронавирусдан вафот этганлар сони 90 нафарга яқинлашяпти. Бу рақамлар ҳам ортиб бормоқда.

Ҳозир коронавирусга қарши кураш учун ҳамма сафарбар этилган. Тиббиёт тизимидаги 75 минг нафар шифокор, 440 минг нафарга яқин ўрта тиббиёт ходимининг қўлидан ҳеч нарса келмайди. Қачонки халқ бу ҳаракатнинг бошида бўларкан, жараённи асосий иштирокчисига айланаркан, бунга таъсир қилишимиз мумкин.

Эпидемиологик жараённинг учта бўғини бор — манба, юқиш йўли ва юқтириб олувчи шахс. Биз қайси бирини ‘ўйин’дан чиқарсак, касалликни жиловлаш имкониятига эга бўламиз?», — деди Нурмат Отабеков.

Эслатиб ўтамиз, Соғлиқни сақлаш вазирлиги статистикаси бўйича коронавирус асоратларидан вафот этганлар сони 90 нафарга етди, «Дарё» ҳисоб-китобига кўра эса Ўзбекистондаги ўлим ҳолатлари 92 тани ташкил этмоқда. Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов вафот этганини эълон қилган, бироқ ушбу ҳолатлар ССВ томонидан айни вақтгача тасдиқлангани йўқ.

Аввалроқ Нурмат Отабеков Ўзбекистон аҳолисида коронавирусга қарши антитана таҳлилини ўтказиш режалаштирилаётганини маълум қилганди.