«Реал» мухлислари мавсумнинг энг яхши ва ёмон ўйинчисини аниқлади

Испаниянинг Marca нашри мухлислар ўртасида «Реал»нинг ушбу мавсумдаги энг яхши ўйинчисини аниқлаш учун сўровнома ўтказди.

Мухлислар ҳужумчи Карим Бенземани «қироллик клуби»нинг 2019/20 йилги мавсумдаги энг яхши ўйинчиси деб топди. Иккинчи ўринни ҳимоячи Серхио Рамос эгаллаган бўлса, дарвозабон Тибо Куртуа кучли учликка якун ясаб берди. Шунингдек, кучли бешликдан ярим ҳимоячилар Каземиро ва Тони Кроос ҳам жой олган.

Мадрид клуби мухлислари уэлслик вингер Гарет Бэйлни жамоанинг энг ёмон ўйинчиси деб топди. Футболчи Испания чемпионатининг жорий мавсумида 16 та ўйинда майдонга тушиб, 2 та гол урди ва худди шунча голга ҳаммуаллифлик қилди.

Аввалроқ «Реал» Бэйлнинг 2 йиллик маошини тўлаб бериб, у билан ҳамкорликни тўхтатмоқчилиги ҳақида хабар берилганди.

Эслатиб ўтамиз, «Реал» Испания Ла Лигасининг 37-турида «Вильярреал»ни мағлубиятга учратиб, муддатидан олдин чемпионликни қўлга киритди. Бу «Реал» тарихидаги 34-чемпионлик бўлди. Сўнгги бор мадридликлар ушбу мусобақада 2016/2017 йилги мавсумда ғолиб бўлган.