«Бунёдкор» ҳимоячиси Исломжон Қобиловнинг коронавирусга чалингани маълум қилинди

Coca-Cola Суперлига 9-тури доирасида 14 июль куни бўлиб ўтиши режалаштирилган «Бухоро» — «Бунёдкор» учрашуви бекор қилинганди.

Боиси «Бунёдкор» футболчиларидан бири коронавирус инфекциясини юқтириб олганликда гумон қилинганди. Клуб бош директори Улуғбек Мирзаевнинг «Kun.uz»га маълум қилишича, жамоа ҳимоячиси Исломжон Қобилов коронавирусга чалингани тасдиқланган.

«7 июль кунги Суперлига доирасидаги «Навбаҳор» билан ўйин олдидан футболчиларимиздан бирида ҳарорати кўтарилиб, иситма кузатилди. Лекин ўйинга 2 кун қолганида футболчи ўзини яхши ҳис қилаётганини мураббийлар штабига айтди, шахсан ўзим ҳам гаплашдим. Шу боис у «Навбаҳор»га қарши ўйинда майдонга тушди. Гап жамоамиз ҳимоячиси Исломжон Қобилов ҳақида кетаяпти.

Ўйин якунидан кейин барибир тест топшириш кераклиги ҳақида қарорга келдик ва 9 июль куни Исломжон Қобилов тест топширди. 12 июль куни эса тест жавобида унинг вирус юқтириб олгани маълум бўлди. Шунга қарамай, шифокорлар ва инфексионистлар клуб қароргоҳида бўлиб, футболчимизни текширувдан ўтказишди ва уларнинг айтишича бу вирус олиб юрувчи шахс эмас. Қобиловдаги вирус аломатлари жуда енгил эканлиги туфайли иситмаси ҳам пасайган. Футболчига 4-5 кун даволаниш тавсия қилинди.

Шунга қарамай, клуб ва қароргоҳимиздаги жами 65 нафар кишини тест топширишга ундадик. 20 нафар футболчимиз бўйича жавоблар маълум бўлди, улардан ҳеч бирида вирус аломатлари йўқ. Тез орада ходимларимизнинг ҳам топширган тест жавоблари берилади. Умид қиламанки, ҳеч кимда инфекция аниқланмайди. Ҳаммаси яхши бўлса, биз бу маълумотларни ПФЛга тақдим этамиз. Рухсат берилгач, Суперлига доирасидаги «Металлург»га қарши ўйинга тайёргарликни бошлаймиз», — дейди Улуғбек Мирзаев.

Қайд этиш жоиз, «Бунёдкор» билан ўйиндан сўнг «Навбаҳор» футболчилари ҳам коронавирус учун тест топширган ва уларнинг ҳеч бирида инфекция аниқланмаган эди.

Эслатиб ўтамиз, Про-Лига 3-тури доирасида 15 июль куни Хоразмда бўлиб ўтиши керак бўлган «Хоразм»—«Динамо» учрашуви бекор қилинди. Хоразмликлар сафида бир неча футболчини ўзини яхши ҳис қилмаётгани, «Динамо» уч нафар футболчиси эса коронавирусга чалинганликда гумон қилинмоқда.