Ўзбекистонда 15 июль куни 496 кишида коронавирус аниқланди. Беш киши вафот этди
Ўзбекистонда 14 июль соат 23:30 дан 15 июль соат 23:30 га қадар коронавирусга чалиниш билан боғлиқ 496 та ҳолат қайд этилди.
Янги касалланиш ҳолатлари
Янги касалланганларнинг- 200 нафари карантин муассасаларида (касаллик аниқланган беморларнинг барчаси хориждан келгач, карантинга олинган);
- 291 нафари коронавирусга чалинган беморлар билан мулоқотда бўлганлиги сабабли намуна олинган фуқаролар орасида (Тошкент шаҳрида — 131 нафар, Андижон вилоятида — 112 нафар, Наманган вилоятида — 16 нафар, Сурхондарё вилоятида — 15 нафар, Қашқадарё вилоятида — 12 нафар, Навоий вилоятида — 5 нафар);
- 5 нафари аҳоли орасида (барчаси Наманган вилоятида) аниқланган.
Бир кун олдин хориждан келиб, карантинга олинган фуқаролар орасида биронтаям янги ҳолат қайд этилгани ҳақида хабар берилмаганди. 15 июлда эса ССВ хориждан келган 200 кишида коронавирус аниқланганини хабар берди. Хориждан келганларнинг асосий қисми Тошкент вилоятидаги «Ўртасарой» карантин марказига жойлаштирилади.
Тошкент шаҳрида аниқланган 131 та ҳолатнинг барчаси коронавирусга чалинган беморлар билан мулоқотда бўлганлиги сабабли намуна олинган фуқаролар орасида қайд этилди. 8—14 июль оралиғида Тошкентда аҳоли орасида 1163 киши касаллик юқтириб олгани маълум қилинганди. 15 июлда эса аҳоли орасида биронтаям янги ҳолат қайд этилмади. Пойтахтда бунақаси охирги марта 3 июнда содир бўлганди.
ССВ келтираётган жадвалда Тошкент шаҳри, Тошкент вилояти ва Сирдарё вилоятининг кўрсаткичлари бирга юритилмоқда. Айни вақтда ушбу ҳудудда 10,5 мингдан ортиқ кишида касаллик аниқлангани маълум қилинган. Бироқ Шавкат Мирзиёев раислигида 15 июль, чоршанба куни ўтказилган видеоселекторда вирус юқтирганлар сони пойтахтда 4092 кишини ва Тошкент вилоятида 1498 кишини ташкил этаётгани айтилган.
Президент раислигидаги йиғилишда Тошкент шаҳри ва Тошкент вилоятида ҳокимлар ва секторлар раҳбарлари ишониб топширилган ҳудудлардаги ҳақиқий аҳволни ўрганмагани айтилди. «Тиббиёт муассасаларидаги реал вазиятни билмайди. Аҳолини вирусдан огоҳлантириш ва сақлаш, касалларни ўз вақтида ва тўғри даволаш учун масъулиятни ҳис қилмаган», — деди давлат раҳбари.
Коронавирус тарқалишининг олдини олиш ва даволаш бўйича Тошкент шаҳридаги ишларни талаб даражасида ташкил этмагани, эпидемиологик вазиятнинг салбий ўзгаришларига тайёр бўлишни таъминламагани, бу касаллик билан «пастга тушиб» мукаммал шуғулланмагани учун соғлиқни сақлаш вазири Алишер Шодмонов ва Тошкент шаҳар ҳокими Жаҳонгир Ортиқхўжаевга ҳайфсан эълон қилинди. Шаҳар ва вилоятнинг барча сектор раҳбарлари жиддий огоҳлантирилди.15 июлдаги видеоселекторда Президент коронавирус билан боғлиқ мураккаб вазиятдан чиқиб кетиш бўйича Наманган, Фарғона ва Самарқанд вилоятлари қаторида Андижонни ҳам мисол қилиб келтириб, оғир шароитдан мазкур ҳудудлардаги биринчи раҳбарлар фидойилиги, қаттиққўллиги учун чиқиб кетилганини таъкидлаганди. Андижон вилоятида кун давомида коронавирусга чалинган беморлар билан мулоқотда бўлганлиги сабабли намуна олинган фуқаролар орасида 112 та ҳолат аниқланди. Бу вилоят учун янги антирекорд. Андижонда илгари бир кунда аниқланган касалликлар сони ҳеч қачон 100 тага ҳам етмаганди. 6 июлда 80 кишида касаллик аниқланиши Андижон учун энг катта кўрсаткич бўлиб турганди. Ой бошида вилоятда коронавирусга чалиниш ҳолатлари 209 тани ташкил этаётганди. Аммо 2 ҳафта ичида беморлар сони 496 нафарга етди. Андижонда жами касалланиш ҳолатларининг 58 фоизи айнан июль ойида содир бўлди. Андижон, шунингдек, шифохоналардаги беморлар сони бўйича Тошкентдан сўнг иккинчи ўринда турибди.
Наманган вилоятида кун давомида 21 та ҳолат қайд этилди. Ушбу ҳолатларнинг 16 таси коронавирусга чалинганлар билан мулоқотда бўлиб, карантинга олинган фуқаролар орасида, 5 нафари аҳоли орасида аниқланди. Кун якунида Намангандаги 16 та ҳолат коронавирусга чалинган беморлар билан мулоқотда бўлганлиги сабабли намуна олинган фуқаролар орасидаги ҳолатларга киритилди. Ой бошидан бери вилоятда 164 кишида касаллик аниқланди. Бу Намангандаги жами касалланиш ҳолатларининг 35 фоизи деганидир.
Сурхондарё вилоятида коронавирусга чалинган беморлар билан мулоқотда бўлганлиги сабабли намуна олинган фуқаролар орасида 15 та ҳолат аниқланган. Июль ойининг ўзида вилоятда 122 кишида касаллик аниқланди. Бу Сурхондарёда аниқланган барча касалланиш ҳолатларининг 55 фоизи деганидир.
Қашқадарё вилоятида коронавирусга чалинган беморлар билан мулоқотда бўлганлиги сабабли намуна олинган фуқаролар орасида 12 та ҳолат аниқланган. Тошкент, Бухоро, Самарқанд, Наманган ва Андижондан кейин Қашқадарёда ҳам касалланганлар сони 400 нафардан ошди. Июль ойида вилоятда касалланганлар сони 212 нафарга кўпайди. Қашқадарёдаги касалланиш ҳолатларининг 52 фоизи июль ойига тўғри келди.
Навоий вилоятида аниқланган 5 та ҳолат коронавирусга чалинган беморлар билан мулоқотда бўлганлиги сабабли намуна олинган фуқаролар орасида қайд этилди. Хоразм ва Фарғона вилоятларидан сўнг Навоий фоиз ҳисобида июль ойида касаллар сони кўпайиши бўйича энг паст кўрсаткичлардан бирини кўрсатмоқда. Вилоятдаги умумий касалланиш ҳолатларининг 22 фоизи июль ойига тўғри келмоқда. Аммо шу ойнинг ўзида вилоятда 4 киши вафот этди. Ушбу ўлим ҳолатларининг ҳозирча 3 таси ССВ томонидан тасдиқланган.
Ўлим ҳолатлари ва аҳволи оғир беморлар
Кун давомида ССВ 4 та ўлим ҳолати ҳақида хабар берди. Шунингдек, Давлат хизматлари агентлиги ҳам ўз ходимининг коронавирусдан вафот этганини маълум қилди. Вафот этганларнинг бари эркаклардир.Биринчи ўлим. Тошкент шаҳрининг Чилонзор туманида 66 ёшли И.И. исмли эркакда 5 июлда ҳансираш, йўтал пайдо бўлган ва у уй шароитида даволанишни бошлаган.
Аммо аҳволи оғирлашавергач, 8 июль куни тез тиббий ёрдам машинасида Зангиота туман кўп тармоқли юқумли касалликлар шифохонасига олиб келинган. Нафас етишмовчилиги белгилари кучайгани сабабли реанимация бўлимига ётқизилган. Унга COVID-19 инфекцияси ўта оғир кечиши, икки томонлама пневмония ташхиси қўйилган. Касаллик ўткир нафас ҳамда сурункали буйрак етишмовчилиги билан кечган. Шунингдек, юрак ишемик касаллиги, гипертония, қандли диабет, бош мия қон томирлари атеросклерози каби ҳамроҳ касалликлари билан ҳам оғриган.
Шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас, сурункали буйрак ҳамда ўпка-юрак етишмовчилигидан вафот этган. 66 ёшли эркак коронавирус асоратларидан вафот этган Тошкент вилоятидаги олтинчи, Ўзбекистондаги 68-бемор бўлди.
Иккинчи ўлим. Тошкент вилояти Пискент туманида яшовчи 37 ёшли М.М. исмли эркакда 3 июлда ҳансираш, йўтал пайдо бўлган ва у уй шароитида даволанишни бошлаган. Аммо аҳволи оғирлашгач, 9 июлда тез тиббий ёрдам машинасида Зангиота кўп тармоқли юқумли касалликлар шифохонасининг реанимация бўлимига ётқизилган.
12 июль куни эса беморда ўпка артерияси тромбоэмболияси белгилари бошланган ва сунъий нафас олдириш аппаратига уланган. Унга COVID-19 инфекцияси ўта оғир кечиши, икки томонлама пневмония ташхиси қўйилган. Касаллик ўпка артерияси тромбоэмболияси, ўткир нафас етишмовчилиги билан кечган.
Шифокорлар томонидан стандартлар асосида ўтказилган реанимацион муолажаларга қарамасдан, беморнинг аҳволи кескин оғирлашиб, ўпка артерияси тромбоэмболияси, ўткир нафас ва ўпка-юрак етишмовчилигидан вафот этган. 37 ёшли эркак коронавирус асоратларидан вафот этган Тошкент вилоятидаги еттинчи, Ўзбекистондаги 69-бемор бўлди.
Учинчи ўлим. ИИВ матбуот хизмати 13 июль, душанба куни Тошкент шаҳар ИИББ Ахборот технологиялари, алоқа ва ахборотни ҳимоялаш бўлими бошлиғи ўринбосари, майор Аълохон Шомаҳмудовнинг вафот этганини эълон қилди. 15 июль куни унинг коронавирусдан вафот этганини «Дарё»нинг ички ишлар органларидаги манбаси маълум қилди.
Ушбу ўлим ҳолатини ССВ кун охирида тасдиқлади.
«Олмазор туманида яшовчи 36 ёшли Ш.А. тана ҳарорати кўтарилиши, умумий ҳолсизлик сабабли Тошкент шаҳар Ички ишлар бош бошқармаси тиббиёт бўлими поликлиникасига мурожаат қилган. Шундан сўнг COVID-19 инфекциясига намуна топширган ва 13 июль куни касаллик тасдиқланган.
Бемор Тошкент шаҳар Ички ишлар бош бошқармаси тиббиёт бўлими поликлиникаси томонидан тиббий кузатувда бўлган. Сўнгги кунларда беморнинг тана ҳарорати тушмаган. У ўткир юрак-қон томир ва нафас етишмовчилигидан вафот этган», — дейилади ССВ хабарида.
Тошкент шаҳар ИИББ майорининг ўлими Соғлиқни сақлаш вазирлиги томонидан 2 кун кеч эълон қилинди. Ваҳоланки, ССВ хабарида беморда 13 июль куни коронавирус тасдиқлангани айтилган.
36 ёшли эркак коронавирус асоратларидан вафот этгани ССВ томонидан тасдиқланган 70-бемор бўлди.
Тўртинчи ўлим. Ички ишлар вазирлиги 14 июль, сешанба куни ИИВ Миграция ва фуқароликни расмийлаштириш бош бошқармаси бўлими бошлиғи подполковник Шавкат Нафасовнинг вафоти муносабати билан таъзия эълон қилди. «Дарё»нинг ички ишлар органларидаги манбаси унинг коронавирусдан вафот этганини маълум қилди.
ИИВ подполковнигининг вафоти ҳақида 15 июль куни ССВ маълумот берди.
Вазирлик аборот хизматининг хабарига кўра, Тошкент туманида яшаган 48 ёшли Ш.Н. 2020 йил 24 июнда хизмат сафари билан Сурхондарё вилоятида бўлиб, тана ҳарорати кўтарилганлиги ва ҳолсизлик сабаб вилоят Ички ишлар бошқармаси тиббиёт бўлимига мурожаат қилган. Унда COVID-19 инфекцияси тасдиқлангач, вилоят шифохонасига ётқизилган. Беморда ўткир нафас етишмовчилиги кузатилган.
Унга COVID-19 инфекцияси ва икки томонлама пневмония оғир кечиши, ўткир нафас етишмовчилиги, юрак ишемик касаллиги, сурункали бронхит ташхиси қўйилган. 14 июль куни унинг аҳволи кескин оғирлашган. Реанимация бўлими шифокорларининг муолажаларига қарамасдан бемор ўткир юрак-қон томир ва нафас етишмовчилигидан вафот этган.
ИИВ подполковниги коронавирус асоратларидан вафот этгани ССВ томонидан тасдиқланган Ўзбекистондаги 71-бемор бўлди.
Бешинчи ўлим. Давлат хизматлари агентлиги жамоаси Давлат хизматлари агентлиги Навоий вилояти бошқармасининг масъул ходими Адҳамжон Деҳқоновнинг вафоти муносабати билан марҳумнинг қариндош ва яқинларига чуқур таъзия изҳор этди. Агентлик хабарида Адҳамжон Деҳқоновнинг коронавирусдан вафот этгани айтилади. Марҳум 61 ёшда бўлган.
Мавзуга доир: «У коронавирус қурбони бўлгани йўқ» — Абдурайим Абдуваҳобов ўлимига нисбатан шубҳаларга ойдинлик киритилди
Касалликдан даволаниш
15 июль куни Тошкент шаҳридаги тиббиёт муассасаларида 135 нафар, Қашқадарё вилоятида 97 нафар, Самарқанд вилоятида 49 нафар, Сурхондарё вилоятида 34 нафар, Жиззах вилоятида 9 нафар ҳамда Фарғона вилоятида 4 нафар, жами 328 нафар бемор коронавирусдан соғайди. Биринчи марта бир кунда коронавирусдан соғайганлар сони 300 нафардан ошиб, рекорд ўрнатилди.Ҳозирда касаллик қайд этилган жами 14 581 нафар бемордан 8655 нафари соғайиб, даволаниш кўрсаткичи 59 фоизни ташкил этмоқда. Бу борадаги кўрсаткич икки кундан буён ўзгармаяпти. Қашқадарё вилоятида бир кунда 97 нафар бемор соғайганидан сўнг даволаниш кўрсаткичи 50 фоиздан паст бўлган биронтаям ҳудуд қолмади. Ҳозирда бу борадаги энг паст кўрсаткич Тошкентга тегишли — 52 фоиз.
15 июль куни ўтказилган йиғилишда Шавкат Мирзиёев Тошкент шаҳри ва вилоятида аҳолини вирусдан огоҳлантириш ва сақлаш, касалликни ўз вақтида ва тўғри даволаш учун масъулият умуман ҳис қилинмаганини танқид қилди. Соғлиқни сақлаш вазирлиги томонидан ҳам кейинги бир ойда коронавирусни даволаш стратегияси ва тактикаси кескин бузилгани, реал ҳолатдан келиб чиқиб, даволаш амалиёти ўзгартирилмагани танқид остига олинди.
«Шифокорлар томонидан беморларга нисбатан бефарқлик ва совуққонлик ҳолатларига ҳам йўл қўйилмоқда», — деди давлат раҳбари.
Шавкат Мирзиёев Ўзбекистон бўйича жами касалларнинг 40 фоизи Тошкент шаҳрига тўғри келаётганини қайд этиб ўтди.
«Агар бу ерда садоқатли одамлар ўтирганида, сиёсатга хайрихоҳ одамлар ўтирганида, Тошкентда шундай шармандалик мумкинмиди? Тошкентда иложи бор-ку ҳамма нарсанинг», — деди Президент.
Шунингдек, йиғилишда бу икки ҳудудда коронавирус тарқалишига қарши кураш ва аҳолини даволаш ишларига алоқадор барча вазирлик ва идоралар, йирик тиббиёт муассасалари раҳбарларидан иборат 24 соат ишлайдиган штаблар ташкил қилиш кўрсатмаси берилди. Тошкент шаҳри ва вилоятидаги поликлиникалар ҳузуридаги мобил гуруҳлар сонини уч баробар кўпайтириш вазифаси юклатилди. Зангиота туманида яқинда иш бошлаган шифохонадаги жой сонини яна 1000 ўринга кўпайтириш топшириғи берилди.
Айни пайтда 5855 нафар бемордан 4994 нафари Тошкент шаҳри ва вилоятида даволанмоқда. Фарғонада 10, Хоразмда 21, Жиззахда 22, Навоийда 49, Сурхондарёда 58, Бухорода 60, Қорақалпоғистонда 63, Самарқандда 129 ва Қашқадарёда 131, Наманганда 145 ва Андижонда 173 нафар бемор қолди.
Telegram’даги «Troll.uz» каналида COVID-19’га топширган тест натижаси «манфий» чиққан одамларни карантинда ушлаб туриб, маълум муддат ўтгач уларни коронавирус инфекциясидан даволаш учун миллионлаб сўм харажат қилингани ҳақидаги ҳужжатларга имзо қўйдириб олиш ҳолатларининг учрагани ҳақида пост эълон қилинганди. Бош прокуратура ушбу хабар юзасидан ўрганиш олиб борилишини маълум қилган.
