АҚШда дастлабки тадқиқотларда муваффақиятга эришган коронавирусга қарши вакцина 30 минг кишида синовдан ўтказилади

АҚШда жойлашган Moderna компанияси ишлаб чиққан COVID-19 вакцинаси дастлабки синовларда қатнашган барча кўнгиллиларда иммунитет ҳосил қилди. Энди у 30 минг кишида синовдан ўтказилади, дея хабар беради «Интерфакс» New England Medicine Journal’га таяниб.

Тадқиқот вакцинанинг битта дозасидан кейин антитаналар ишлаб чиқарилганлигини кўрсатди. Тўрт ҳафта ўтгач, кўнгиллилар иккинчи дозани қабул қилишди. Шундан сўнг барча 45 нафар кўнгиллида вакцина кучли иммунитет ҳосил қилди.

Moderna компанияси бош директори Стефан Бансел натижалар «далда берувчи ва mRNA-1273 номли вакцинани ишлаб чиқаришга қўйилган муҳим қадам» эканини айтиб ўтди.

Тадқиқот Жоржия штатидаги Сиэтл ва Эмори университетида 18 ёшдан 55 ёшгача бўлган 45 нафар коронавирусга чалинмаган, соғлом кўнгилли иштирок этди. Тажриба иштирокчиларига 25, 100 ва 250 микрограммда Moderna вакцинаси юборилган.

27 июль куни Moderna 30 000 кўнгилли иштирокида вакцина синовининг учинчи босқичини бошлайди.

Аввалроқ АҚШда коронавирусга қарши вакцина ишлаб чиқариш ёз охирларига бориб йўлга қўйилиши мумкинлиги ҳақида хабар берилган эди.