Президент Шавкат Мирзиёев раислигида видеоселектор йиғилиши ўтмоқда. Йиғилишда Тошкент шаҳри ва Тошкент вилоятидаги кескин санитар-эпидемиологик вазият муҳокама қилинмоқда. Бу ҳақда Президент матбуот хизмати хабар берди.
Таъкидланишича, йиғилиш ўтказилишига кейинги пайтда ушбу ҳудудларда кузатилаётган коронавирус инфекциясининг янги тўлқини ва ўлим ҳолатларининг кўпайиши сабаб бўлган. Шунингдек, аҳоли томонидан тиббий хизматлар тезкорлиги ва сифати ҳамда дорихоналарда тиббиёт маҳсулотлари нархининг асоссиз ошаётгани бўйича кўплаб мурожаат ва шикоятлар тушаётгани сабабли йиғилиш ташкил қилинган.
Эслатиб ўтамиз, Шавкат Мирзиёев 14 июль куни ўтказилган видеоселекторда коронавирусга қарши кураш учун мамлакатда барча захира ва имкониятлар мавжудлигини таъкидлади, бироқ ҳозирда эпидемиологик вазият жуда оғирлигини айтди. Шунингдек, давлат раҳбари коронавирусни аниқлаш учун тест топшириш жараёнини соддалаштириш, ҳудудларда уч ойлик дори захирасини яратиш ҳамда дорихоналарда ва бозорларда нархлар ошишининг олдини олиш бўйича топшириқ берди. Шунингдек, зарур жойларда карантин чораларини кучайтириш бўйича топшириқ берилди.
Маълумот учун, Тошкент шаҳри ва Тошкент вилоятида 14 июль соат 23:30 ҳолатига кўра, 10 234 нафар бемор ва касалликнинг 41 нафар қурбони қайд этилган. 15 июль соат 10:00 ҳолатига кўра, Тошкент шаҳрида 71 нафар, соат 17:30 ҳолатига кўра, 60 нафар янги бемор қайд этилди. 15 июль куни Тошкент шаҳри ва вилоятида икки нафар коронавирус бемори вафот этди.
Изоҳ (0)