Сурхондарё вилояти Жарқўрғон туманида судьяларнинг омма олдида обрўсизлантирилганлиги, суд ходимининг эса дўппосланганлиги ҳолатига қонуний баҳо берилиши сенаторлик назоратига олингани хабар берилган эди.
Бош прокуратура матбуот хизматининг хабар беришича, мазкур ҳолат юзасидан Сурхондарё вилояти прокуратураси томонидан ўтказилган текшириш натижасига кўра, Жиноят кодексининг 206-моддаси (Ҳокимият ёки мансаб ваколати доирасидан четга чиқиш) билан жиноят иши қўзғатилиб, тергов ҳаракатлари олиб борилмоқда.
Тергов ҳаракатлари Бош прокуратура томонидан назоратга олинган.
Эслатиб ўтамиз, воқеа 10 июль куни содир бўлган. Жиноят ишлари бўйича Жарқўрғон туман судининг раиси Я.Б. ҳамда ҳайдовчи Р.Р. хизмат машинасида туман суди биноси томон ҳаракатланиб кетаётганида туман марказига кираверишда блокпостда улар тўхтатилган ва постдан ўтказилмаган.
Шу вақтда постда бўлган туман ҳокими З.Давлатов бошчилигидаги ишчи гуруҳ постдан ўтиш учун навбат кутиб турган тирбанд фуқаролар олдида судья ва суд ходимларини обрўсизлантиришга уринган. Уларга қўполлик қилиб, автомашина калитини олиб қўйиб, суд ходимини вақтинча ушлаб туриш ҳибсхонасига қамаб қўйган.
Мавзуга доир: Сирдарёда судья ИИБ ходимлари томонидан калтакланди
Изоҳ (0)