Ижтимоий тармоқларда Чирчиқ шаҳрида жойлашган Тошкент вилояти юқумли касалликлар шифохонаси тиббий ходимлари шифохонадан кетиб қолгани, муассаса эса ёпилгани ҳақидаги хабарлар тарқалди. Ушбу хабарлар юзасидан Тошкент вилояти ҳокимлиги расмий муносабат билдирди.
Қайд этилишича, бундай хабарлар ёлғон бўлиб, ҳақиқатга тўгри келмади. Тошкент вилояти юқумли касалликлар шифохонаси бош шифокори Гулжаҳон Йўлдошева вилоят Соғлиқни сақлаш бошқармаси бошлиғи Тўрақул Арзиқуловга расман хат орқали мурожаат қилиб, 11—15 июль кунлари мазкур шифохонада дезинфекция, дератизация, ювиш ва чайиш ишларини олиб боришга рухсат сўраган.
«Вилоят соғлиқни сақлаш бошқармасининг розилиги асосида айни пайтда Чирчиқ шаҳридаги вилоят юқумли касалликлар шифохонасида инфекция тарқалишининг олдини олиш мақсадида юқоридаги ишлар амалга оширилмоқда», — дейилади вилоят ҳокимлифги хабарида.
Шунингдек, шифохонанинг тиббий ходимларнинг карантин шароитидаги меҳнат фаолиятини баҳолашда, уларни рағбатлаштиришда мавжуд ҳуқуқий ҳужжатларга риоя этилмагани, карантинга олинганлар, коронавирус инфекцияси билан оғриган беморларни даволашда иштироки муносиб баҳоланмаётгани ҳақидаги хабарларга ҳам тўхталиб ўтилган.
Билдирилишича, Тошкент вилояти юқумли касалликлар шифохонаси беморларни даволаш билан шуғулланмаган, карантинга олинган фуқаролардан лаборатор таҳлилларни олиш, инфекция аниқланган беморларни махсус шифохоналарга йўлланма асосида юборишда қатнашган.
«Бу ҳолатда улар тўлиқ циклда 14 кун давомида беморларни даволашда иштирок этмагани инобатга олинади ва моддий рағбатлантириш тартиби шу жиҳатга асосан, бевосита беморларни даволашда қатнашган шифокорлар билан бир хил бўлмайди.
Ҳеч ким, ҳеч бир ташкилот ва идора Президентнинг ‘Коронавирус инфекцияси тарқалишига қарши курашишга жалб қилинган тиббиёт ва санитария-эпидемиология хизмати ходимларини қўллаб-қувватлашга оид қўшимча чора-тадбирлар тўғрисида»ги қарори ҳамда Республика махсус комиссиясининг қарорида белгиланган меъёрларни ўзгартирган ҳолда қўшимча рағбатлантиришни амалга оширишга ҳақли эмас’, — дейилади хабарда.
Эслатиб ўтамиз, Ўзбекистонда коронавирус қайд этилганидан кейин Тошкент шаҳридаги бир қатор тиббиёт муассасалари карантинга ёпилди. Улар қаторидан Республика перинатал маркази, 17-шаҳар клиник шифохонаси ва 8-оилавий поликлиника, 6-сонли туғруқхона, 62-сонли оилавий поликлиника ўрин олган.
Коронавирусга қарши кураш штаби аъзоси Ҳабибулла Оқилов 14 июль куни бўлиб ўтган матбуот анжуманида Ўзбекистондаги коронавирус аниқланган шифохоналарни 14 кунга ёпиш нотўғри бўлганини айтганди. Шунингдек, Зангиотадаги махсус клиника очилганига бир ҳафта бўлмасдан беморларга тўлиб бўлганини, агар касаллар сонининг ошиши шу тарзда давом этса, бошқа клиникалар ҳам коронавирусни даволаш учун мослаштирилиши мумкинлигини маълум қилган.
Бундан ташқари, Тошкент шаҳар ва Тошкент вилояти ҳокимликлари билан биргаликда ОТМ ва касб-ҳунар коллежлари талабалар турар жойларини карантинда сақлаш жойларига мослаштириш чоралари кўрилмоқда.
Изоҳ (0)