2020 йилда Samsung’нинг флагман линейкасида бир вақтнинг ўзида учта модель — Galaxy S20, S20+ ва S20 Ultra пайдо бўлди. Hi-Tech.Mail.ru’нинг ёзишича, компания ушбу қаторга ҳамёнбоп Galaxy S20 Lite версиясини ҳам қўшиш ниятида.

Фото: Hi-Tech.Mail.ru

Янги Galaxy S20 Lite ҳам ўзидан олдинги версия каби Snapdragon 865 процессорида ишлайди. 2019 йилда тақдим этилган Galaxy S10 флагманидан ҳамёнбоп версияси — S10 Lite’га арзонроқ процессор ўрнатилган эди.

Ҳамёнбоп флагман SМ-G781B модель рақами остида чиқади. Geekbench бенчмаркида у 2619 балл тўплаган. «Лайт»-версия флагман S20’дан тезкор хотирасининг ҳажми билан фарқ қилади — унга 6 гигабайт ўрнатилган.

Galaxy S20 Lite’нинг дисплейи ҳам арзонроқ моделга ўзгартирилиши мумкин — унинг ўлчами бироз кичикроқ бўлади, пикселлар сони камаяди ва 120 герц юқори частотасини қўллаб-қувватлаш функцияси олиб ташланади. Шунингдек, камераси ҳам соддалаштирилиши кутилмоқда — смартфон арзонроқ бўлиши учун учтанинг ўрнига иккита ўрнатилиши ва сифати пасайтирилиши мумкин.

Ҳозирча Galaxy S20 Lite нархи қанча бўлиши номаълум. Оргинал S20 флагманининг нархи 980 доллардан бошланади.

Аввалроқ Samsung компанияси BTS гуруҳи услубида яратилган Galaxy S20+ ва Galaxy Buds+ моделларини тақдим этган эди.