Мунтазам Samsung ҳақида маълумотлар билан бўлишиб келувчи асосий инсайдерлардан бири стилусга эга янги Galaxy Note20 Ultra’нинг суратлари билан бўлишди, деб хабар беради Hi-Tech.Mail.ru.
Тўлиқ ишлайдиган ушбу нусха суратларидан кўриш мумкинки, модель дизайнига киритилган муҳим ўзгариш — асосий камералар модулининг катталашгани. У корпусдан сезиларли даражада бўртиб чиқиб турибди. Корпус четларининг ўзи эса анча юмалоқлашган, дисплей ён камера ва орқа қопқоққа ўткир бурчакларсиз бирлашиб кетган. Дисплей атрофидаги ҳошиялар ингичкалашган, фронтал камера остида тешик эса бироз кичрайган.
Инсайдер Jimmy is Promo’нинг таъкидлашича, биринчи бор Galaxy Note линейкасида стилус чап тарафга жойлаштирилган. Унинг ёнидан динамик, наушниклар учун 3,5 миллиметрли «разём» ўрин олган.
Note20 тақдимоти август ойида ўтказилиши режалаштирилган. Стилусга эга янги флагмандан ташқари, 5G алоқа тармоғини қўллаб-қувватловчи букланувчан Galaxy Z Flip моделини, Galaxy Fold 2 смартфон-планшетини тақдим этиши керак.
Аввалроқ Samsung тасодифан Galaxy Note20 Ultra флагманининг дизайнини ошкор қилиб қўйгани тўғрисида хабар берилганди.
Изоҳ (0)