Ўзбекистонда 200 ва 500 сўмлик қоғоз пуллар 2020 йил 1 июлдан муомаладан чиқарилиши, Марказий банк аҳолига ўз ихтиёрида бўлган мазкур банкнотларни муомаладаги пул белгиларига алмаштириб олиш кераклигини эслатиб ўтгани ҳақида хабар берилганди.
Марказий банк эски намунадаги ушбу пул белгилари 2020 йил 1 июлга қадар барча тижорат банклари бўлинмалари, 2020 йил 1 июлдан кейин эса Марказий банкнинг ҳудудий Бош бошқармалари Ҳисоб-китоб касса марказлари томонидан қабул қилиниши ва муомаладаги пул белгиларига чекланмаган миқдорда алмаштириб берилишини билдирганди.
Марказий банк томонидан маълум қилинишича, коронавирус пандемияси муносабати билан эълон қилинган карантин шароитида аҳоли ва тадбиркорлик субъектларига қулайлик яратиш мақсадида 200 ва 500 сўм қийматдаги қоғоз пулларни тижорат банклари бўлинмалари томонидан алмаштириб бериш муддати истисно тариқасида узайтирилди.
Тижорат банкларининг барча бўлинмалари, жумладан, банк хизматлари офислари, мини-банклар кассалари ва бошқа банкдан ташқари операцион кассалар томонидан 2020 йил 1 сентябрга қадар эски намунадаги 200 сўмлик ва 500 сўмлик банкнотларни қабул қилиш ҳамда муомаладаги банкнотлар ва тангаларга монеликсиз алмаштириш юзасидан кўрсатма берилди.
«Фуқаролар 200 ва 500 сўмлик банкнотларни ўз ҳудудлари яқинидаги тижорат банкида чекланмаган миқдорда муомаладаги банкнотларга алмаштириб олиши мумкин», — дейилади Марказий банк хабарида.
Қайд этилишича, жаҳон амалиётида ва аксарият ривожланган мамлакатларда нақд пул муомаласида майда қийматдаги пул белгилари сифатида тангалардан кўпроқ фойдаланилади. Танганинг муомалада қолиш муддати банкнотларга нисбатан узоқлиги тўловда фойдаланишдаги қулайлиги билан изоҳланади.
Қоғоз пуллар муомаладан кўп фойдаланилгани сари эскириши, эскирган пулларни йўқ қилиб, ўрнида янгиларини чиқариш қўшимча харажатларни келтириб чиқаради. Шу боис майда қийматдаги банкнотларнинг муомалада юриш муддати тангаларга нисбатан қисқадир.
Шу сабабли Марказий банк томонидан 2018 йилда олдинги йилларда муомалага чиқарилган тангаларга нисбатан ихчамроқ, енгилроқ ва олиб юришга қулай бўлган янги намунадаги 50, 100, 200, 500 сўмлик тангалар муомалага киритилган.
Эслатиб ўтамиз, Ўзбекистонда 2019 йил 1 июлдан бошлаб Марказий банкнинг эски намунадаги (2001—2002, 2004 ва 2009 йиллар намунасидаги) 50 сўмлик, 100 сўмлик тангалари ҳамда (1994 йил намунасидаги) 50 сўмлик ва 100 сўмлик банкнотлари тўлов қобилиятини йўқотганди ва муомаладан чиқарилганди.
Изоҳ (0)