Эрон президенти Ҳасан Руҳонийнинг маълум қилишича, мамлакатда коронавируснинг иккинчи тўлқини ҳукм сурмоқда ва мамлакат унга қарши курашмоқда. Бу ҳақда «РИА Новости» хабар берди.
Аввалроқ Эрон расмийлари мамлакатда коронавирусга чалинганлар сони қайтадан кўпаяётганига қарамасдан, мамлакат касалликнинг биринчи тўлқинини бошдан ўтказаётганини таъкидлаган.
Ҳасан Руҳонийнинг сўзларига кўра, февраль ойининг охирида бошланган биринчи тўлқин апрель ойининг ўртасигача давом этган ва мамлакатнинг шимолий ва марказий қисмларидаги провинцияларда тарқалган. Иккинчи тўлқин эса мамлакат жануби ва чегараларига ёпирилган.
Президентнинг маълум қилишича, иккинчи тўлқин 14 июндан бошланган ва биринчи тўлқиндан кўра кучлироқ бўлмоқда.
Руҳонийнинг айтишича, биринчи тўлқиндан кейин одамлар Эрон коронавирусни енгишга муваффақ бўлди, деб ўйлаган. Унинг умид қилишича, мамлакат кейинги ой давомида иккинчи тўлқиндан ҳам ўтишга муваффақ бўлади.
Эронда коронавирусга чалиниш бўйича илк ҳолат қайд этилган 19 февралдан буён COVID-19 билан хасталаниш бўйича 262 мингта ҳолат қайд этилган, улардан 13,2 мингтаси ўлим билан тугаган. Айни пайтда 225 мингдан ортиқ одам касалликдан тузалган.
Изоҳ (0)