Бокуликлар Арманистон билан урушни қайтадан бошлашни талаб қилиб кўчаларга чиқди (видео)

Боку аҳолиси Арманистон ва Озарбайжон чегарасида юзага келган жанговар ҳаракатлар сабаб мамлакат армиясини қўллаб-қувватлаш мақсадида ноқонуний митинг ўтказди, деб хабар беради «Oxu.az».

Митинг иштирокчилари «Шаҳидлар ўлмайди, Ватан бўлинмайди», «Қорабоғ» ва «Қорабоғга озодлик» шиорлари остида чиқиш қилган.

Шунингдек, йиғилганлар ҳарбий ҳаракатларни қайта бошлашга чақириб, «ўзларига қурол берилишини» талаб қилиб бақирган.

Massive protest in Baku tonight with protestors wanting Azerbaijan to take action against Armenia after 3 days of clashes at the border #Azerbaijan #Armenia pic.twitter.com/nEQt42xkCm

— CNW (@ConflictsW) July 14, 2020

Report нашрнинг ёзишича, минглаб ёшлар мамлакат байроғини кўтариб олиб, «Шаҳидлар аллеяси»дан юриб ўтган. Шу турдаги митинглар Озарбайжоннинг бошқа шаҳарларида ҳам ўтказилган.

«РИА Новости»нинг маълум қилишича, намойиш иштирокчилари Бокудаги парламент биносига киришга уринган ва полиция уларни қувиб юбориш учун «водомёт»лардан фойдаланган. Telegram’даги «Инфотека24» ахборот порталининг ёзишича, намойишчилар парламент биносига киришга муваффақ бўлган. Канал митинг иштирокчилари бино ичида юргани, шунингдек, ҳуқуқ-тартибот органлари ходимлар ичкарига кираётгани тасвирланган видеони эълон қилган.

Эслатиб ўтамиз, икки давлат қўшинлари ўртасидаги тўқнашув Озарбайжон шимоли-ғарбидаги Товуз вилояти ҳудудида 12 июлда содир бўлган. Озарбайжон Мудофаа вазирлиги Арманистонни ўт очиш ҳақидаги аҳдлашувни қўпол равишда бузганлик ва мамлакат артиллерияси жойлашган позицияга ҳужум қилганликда айбламоқда. Идора берган маълумотга асосан, иккала томонда ҳам жанг қурбонлари бор.

13 июлда иккала томон ҳам бир-бирига такрорий тарзда яна ўт очган. Арманистон мудофаа вазирлиги матбуот котиби Шушан Степаняннинг айтишича, икки ёки уч соат давом этган танаффусдан кейин озарбайжонлик ҳарбийлар яна ҳужумга ўтган ва бунга муносиб жавоб қайтарилган. Расмий Боку берган маълумотга кўра, Озарбайжон артиллерияси, миномётлари ва танклари арман таянч пунктини вайрон қилган, ҳарбий техникани бузган ва аскарларни ҳам ҳалок этган.