АҚШ президенти Дональд Трамп мамлакат бошқарувидаги Пуэрто-Рико давлатини 2017 йилда ҳалокатли довулдан кейин сотишни таклиф қилган, деди собиқ АҚШ ички хавфсизлик вазири Элейн Дьюк The New York Times газетасига берган интервьюсида.
Унинг сўзларига кўра, президент оролни «сотишни» ёки ундан қутилишни таклиф қилган.
«Биласизми, президентдан келадиган фикрлар кўпроқ бизнесменларнинг ғояларига ўхшаш эди. Масалан, у ‘Электр токи билан таъминлай оламизми? Оролни сотсак бўладими?’ каби саволлар берар эди», — дея тушунтирди Дьюк.
Шунингдек, у Пуэрто-Рикони сотиш ғояси ҳеч қачон жиддий муҳокама қилинмаганини айтди.2017 йилнинг кузида Мария довули Пуэрто-Рикога қаттиқ зарба берди. Орол маъмуриятига кўра, довул натижада 60 дан ортиқ одам ҳалок бўлган. Жабрланганларга ёрдам бериш ва зарар оқибатларини юмшатиш бўйича Трамп ва маҳаллий ҳокимият ўртасидаги тортишув бўлган.
Хусусан, Сан-Хуан оролидаги энг катта шаҳар мэри Кармен Круз Трампни фалокатни сиёсий мунозарага айлантирганликда айблаган. Бунга жавобан президент Пуэрто-Рико сиёсатчилари ўз ходимларини ёрдамга жалб қила олмаётганликда айблаган.
Ноябрь ойида Пуэрто-Рикода АҚШ ҳудудига қўшилиш бўйича референдум бўлиб ўтади. Пуэрто-Рико губернатори Ванда Васкес Гардес қонун лойиҳасини май ойида имзолаган ва оролда яшайдиган 3,2 миллион америкалик фуқаро учун тўлиқ тенглик кераклигини айтган.
Бу охирги саккиз йил ичида Пуэрто-Рикога Қўшма Штатларга қўшилиш бўйича учинчи референдум. Агар ижобий қарор қабул қилинса, орол 51-штатга айланади. 2017 йилги референдумда кўпчилик АҚШ таркибига қўшилишни ёқлаган. Бироқ Демократлар партияси бунга қарши чиққанди. Яна бир референдум 2012 йилда ўтказилган. Ўшанда Америка штати мақоми учун 61 фоиз Пуэрто-Рико аҳолиси овоз берган. Аммо мазкур қарорга Республикачилар партияси қарши чиққан.
Пуэрто-Рико ҳозирда АҚШ томонидан бошқариладиган ҳудуд мақомига эга, аммо унинг ажралмас қисми эмас. Америка Конституцияси унинг ҳудудида чекланган. Конгрессда Пуэрто-Рико номидан биргина делегат мавжуд бўлиб, унинг овоз бериш ҳуқуқи йўқ. У президент сайловларида иштирок эта олмайди.
Изоҳ (0)