Россияда фаолият олиб бораётган 45 нафар қирғизистонлик тиббиёт ходими маҳаллий ҳамкасбларига ёрдам бериш учун Қирғизистонга олиб келинди. Бу ҳақда «24.kg» республика штабига асосланиб хабар берган.
Фото: Қирғизистон ташқи ишлар вазирлиги
Шифокорлар ва кичик тиббиёт персонали Қирғизистоннинг «қизил» ва «тоза» ҳудудларидаги клиникаларда бир ой давомида фаолият олиб боради. Парвозлар, яшаш шароити ва волонтёрларнинг овқатланиши учун зарурий эҳтиёжлар ҳомийлик маблағлари ҳисобидан қопланади. Тиббиёт ходимлари билан бирга ҳисоблаганда «Аэрофлот» компаниясининг рейсида жами 426 нафар Қирғизистон фуқароси (талабалар, кекса ёшли беморлар, ёш болали ва ҳомиладор аёллар) ҳам республикага олиб келинган.
5 июлда Қирғизистонга 26 нафар қирғиз шифокор волонтёрлари гуруҳи етиб келган. Айни вақтда улар республиканинг «қизил» ҳудудларидаги касалхоналарда фаолият юритмоқда. Уларнинг парвоз харажатлари ҳам меценатлар томонидан Қирғизистоннинг Россиядаги элчихонаси кўмагида қоплаб берилган.
Қирғизистон клиникаларида коронавирус эпидемиясига қарши курашда тиббиёт ходимлари етишмаяпти. Аввал мамлакат бош вазири Қубатбек Бўронов соғлиқни сақлаш тизимидаги барча тиббиёт ходимларини меҳнат таътилидан чақириб олиш бўйича кўрсатма берган. Ҳукумат раҳбари барча шифокор ва ҳамшираларни ўз ҳамкасбларига ёрдам беришга чақирган. Мамлакат соғлиқни сақлаш вазири Мадамин Каратаев Бишкекнинг ўзида меҳнат қилаётган тиббиёт ходимларининг 30 фоизи COVID-19 билан касалланганини маълум қилган. Кейинчалик вазирнинг ўзи пневмонияга чалингани, унинг ўринбосари коронавирус инфекциясини юқтириб олгани хабар қилинди.
Қирғизистонда 2020 йил 13 июль ҳолатига кўра, 11 117 кишида коронавирус инфекцияси аниқланган. Эпидемия даврида 3460 нафар бемор касалликдан тузалган, 147 киши COVID-19 асоратлари оқибатида вафот этган. Шунингдек, мамлакатда коронавирусга топширган тести манфий деб топилган 452 киши пневмония туфайли ҳаётдан кўз юмган.
