Мисрнинг шимолий пойтахти Искандарияда 10 июль куни камида 11 киши Ўрта ер денгизида чўкиб кетди, дея хабар беради Al-Balad.
Маҳаллий нашрнинг хабар беришича, фожиа Палм-Бич пляжида юз берган. Қутқарувчилар етти кишининг жасадини топишга муваффақ бўлган, қолганларини қидириш давом этмоқда.
Қайд этилишича, 10 июль куни тонгда, бир гуруҳ одамлар сузиш учун соҳилга борган. Шу вақтда кичик ёшдаги бола чўкишни бошлаган. Бир неча киши уни қутқаришга ҳаракат қилган, натижада ҳамма ҳалок бўлган.
Искандариянинг туризм ва курорт маъмуриятига кўра, воқеа эрталаб соат 05:00 ларда пандемия туфайли ёпилган соҳилда бўлган. Пляж чеклов сабабли қутқарув хизматлари ва жиҳозлари билан таъминланмаган.Ҳозирда пляжларга ташриф буюриш ва денгизда сузиш тақиқи фақат меҳмонхоналар ва баъзи хусусий пляжлар учун олиб ташланди. Жамоат пляжларида ҳали ҳам дам олиш ва чўмилиш мумкин эмас.
Полициянинг таъкидлашича, кўпчилик узоқ пляжларга боришга ҳаракат қилмоқда. Чунки у ерда полиция уларни пайқамайди. Бундан ташқари одамлар ҳуқуқ посбонларига кўриниш бермаслик учун барвақт чўмилишга бормоқда.
Шу билан бирга, Эл-Агами минтақасидаги ушбу соҳил узоқ вақтдан бери бахтсиз ҳодисалар туфайли «ўлим қирғоқлари» деб номланган. 2018 йилда бир ҳафта ичида 21 киши у ерда ҳалок бўлган, шундан сўнг маҳаллий ҳокимият пляждан фойдаланишни тақиқлаб қўйган.
Изоҳ (0)