10 июль куни Туркманистон президенти Гурбангули Бердимуҳамедов Қозоғистон Хавфсизлик кенгаши раиси Нурсултон Назарбоев билан телефон орқали мулоқот қилди. Бу ҳақда «Хроника Туркменистана» нашри хабар тарқатган.
Телефондаги суҳбатда Бердимуҳамедов Назарбоевни 6 июлда 80 ёшга тўлгани билан табриклаган. Шунингдек, Туркманистон президентининг сўзларига кўра, у раҳбарлик қилаётган мамлакат халқи Йўлбошчи Нурсултон Назарбоевнинг коронавирусдан тузалгани, Қозоғистондаги бунёдкорлик фаолияти учун яна ирода ҳамда матонат намойиш этганидан хурсанд.
Музокараларнинг асосий мавзуси COVID-19 пандемияси ва эпидемиологик соҳалар бўйича ўзаро ҳамкорлик масалалари бўлди.
Бердимуҳамедов коронавируснинг пайдо бўлиши ва тарқалишининг сабабларини ўрганиш бўйича икки давлат олимларининг ҳамкорлигидан манфаатдор эканини таъкидлаган.
«Туркменистан Сегодня» давлат ахборот агентлигининг хабарига кўра, Туркманистон томони «вируслар ҳаво оқимлари орқали кўчиб юриши мумкин» ва бу Орол денгизидаги экологик муаммо билан боғлиқ равишда кечади.
Агентлик хабарида пандемия ва Орол денгизи муаммосининг бир-бирига алоқадорлиги борасида аниқ маълумот берилмаган.
«Инсон соғлиғига хавф солувчи вируслар оғир экологик шароитда ҳаво оқимлари орқали ҳаракатланиши мумкин. Марказий Осиё экологик нуқтаи назардан ўта оғир минтақалардан бири ҳисобланади. Бунга асосий сабаблардан бири Орол денгизидаги муаммо.
Орол денгизи атрофидаги зарарли ҳаво табиатга, географик ҳудудлардаги иқлимга жиддий зиён келтирмоқда ва нафақат ушбу ҳудудда яшовчи балки ундан нарироқдаги бошқа мамлакатлардаги одамлар ҳаётига ҳам хавф солмоқда», – дейилади агентлик хабарида.
ЖССТ COVID-19’нинг ҳавода шамол орқали келиши мумкинлиги ҳақида хабар бермаган. БМТ расмий сайтидаги маълумотга асосан, коронавирус одам йўталганидан ёки акса урганидан кейин муайян вақт давомида ёпиқ бинолардаги ҳавода сақланиб туриши мумкин. Бироқ катта масофага чўзилган очиқ ҳаводаги кенгликларда (ўнлаб-юзлаб километр масофага чўзилган) ҳаводаги инфекция заррасининг кучи йўқолади.
Туркманистон ТИВ 7 июлда илк бора коронавируснинг Орол бўйидаги шамоллар ва туз бўронлари оқибатида юқиши мумкинлиги ҳақида хабар тарқатган, шу куни ЖССТнинг миссияси мамлакатда текширув ишларини амалга оширганди.
Текширувга бир неча кун қолганидан хизмат кўрсатиш соҳаси ходимлари тиббиёт ниқобларини тақиб ишлашни бошлаган, Туркманистон давлат ОАВ соғлиқни сақлаш вазирлиги буни ҳаводаги чанг миқдори кескин ошгани билан изоҳлаётганини маълум қилганди.
«Метеожурнал» метеорологик нашри Туркманистондаги қурилмалар ахборотига асосланган ҳолда ушбу гап-сўзларни инкор этган.
Аввал Туркманистон пойтахтида тиббий ниқоблар нархи бир ҳафтада 14 баравар ошгани, аввалроқ июнь ойи охирларида Ашхободдаги касалхона ходимларида коронавирус аниқлангани ҳақида миш-мишлар тарқалгани ҳақида хабарлар берилган.
Изоҳ (0)