Сурхондарё вилояти ИИБ бошлиғи ўринбосари, Илҳом Юсупов 2020 йил 11 июлдан бошлаб Қизириқ тумани ҳокими сифатида иш бошлади. Бу ҳақда «Дарё»га маълум қилган вилоят ҳокимлиги ахборот хизмати раҳбари Заҳириддин Тўраевнинг таъкидлашича, туманнинг собиқ ҳокими Олим Муҳаммадиев бошқа лавозимга тайинланган.
11 июль, шанба кунидаги иккинчи тайинлов ҳақида Халқ депутатлари Қизириқ тумани кенгашининг навбатдан ташқари сессиясида маълум қилинган.
Сессия ишида туманнинг собиқ ҳокими Олим Муҳаммадиев бошқа ишга ўтганлиги муносабати билан Қизириқ туманига Илҳом Юсуповни ҳоким этиб тайинлаш таклифи ўртага ташланган ва депутатлар томонидан қўллаб-қувватланган.
Қизириқнинг янги ҳокими Илҳом Юсупов 1977 йил Шеробод туманида туғилган. 1998 йилда Ички ишлар академиясини, 2015 йилда Ички ишлар академиясининг Олий академик курсини тамомлаган.
Меҳнат фаолияти давомида Жарқўрғон тумани ИИБ бўлинма бошлиғи, Термиз тумани ИИБ бошлиғи ўринбосари, Денов тумани ИИБ бошлиғи ўринбосари, Қизириқ тумани ИИБ бошлиғи, Денов тумани ИИБ бошлиғи сифатида ишлаган. 2020 йил бошидан вилоят ИИБ бошлиғи ўринбосари лавозимида ишлаб келган.
Эслатиб ўтамиз, аввалроқ вилоятнинг Ангор туманига янги ҳоким тайинлангани, 33 ёшли ҳоким Сурхондарё вилоятидаги энг ёш ҳоким эканлиги хабар қилинганди.
Изоҳ (0)