Surxondaryo viloyati IIB boshlig‘i o‘rinbosari, Ilhom Yusupov 2020-yil 11-iyuldan boshlab Qiziriq tumani hokimi sifatida ish boshladi. Bu haqda “Daryo”ga ma’lum qilgan viloyat hokimligi axborot xizmati rahbari Zahiriddin To‘rayevning ta’kidlashicha, tumanning sobiq hokimi Olim Muhammadiyev boshqa lavozimga tayinlangan.
11-iyul, shanba kunidagi ikkinchi tayinlov haqida Xalq deputatlari Qiziriq tumani kengashining navbatdan tashqari sessiyasida ma’lum qilingan.
Sessiya ishida tumanning sobiq hokimi Olim Muhammadiyev boshqa ishga o‘tganligi munosabati bilan Qiziriq tumaniga Ilhom Yusupovni hokim etib tayinlash taklifi o‘rtaga tashlangan va deputatlar tomonidan qo‘llab-quvvatlangan.
Qiziriqning yangi hokimi Ilhom Yusupov 1977-yil Sherobod tumanida tug‘ilgan. 1998-yilda Ichki ishlar akademiyasini, 2015-yilda Ichki ishlar akademiyasining Oliy akademik kursini tamomlagan.
Mehnat faoliyati davomida Jarqo‘rg‘on tumani IIB bo‘linma boshlig‘i, Termiz tumani IIB boshlig‘i o‘rinbosari, Denov tumani IIB boshlig‘i o‘rinbosari, Qiziriq tumani IIB boshlig‘i, Denov tumani IIB boshlig‘i sifatida ishlagan. 2020-yil boshidan viloyat IIB boshlig‘i o‘rinbosari lavozimida ishlab kelgan.
Eslatib o‘tamiz, avvalroq viloyatning Angor tumaniga yangi hokim tayinlangani, 33 yoshli hokim Surxondaryo viloyatidagi eng yosh hokim ekanligi xabar qilingandi.
Izoh (0)