«Реал» Ла Лигада 14 йил олдинги кўрсаткичини такрорлади

Мадриднинг «Реал» клуби Испания чемпионатининг 35-турида «Алавес»ни қабул қилиб, 2:0 ҳисобида ғалаба қозонди.

Учрашувда ҳисоб 12-дақиқада ҳужумчи Карим Бензема томонидан очилди, франциялик футболчи 11 метрлик пенальти зарбасини аниқ амалга оширди.

Қайд этиш жоиз, «қироллик клуби»нинг сўнгги учта голи айнан пенальтидан киритилди. «Атлетик» (1:0) ва «Хетафе» (1:0) қарши ўйинларда Серхио Рамос пенальтидан гол урган, ҳар иккала ҳолатда ҳам голлар ғалаба тўпи бўлиб хизмат қилди. Шу тариқа «Реал» Ла Лигада 2006 йилдан бери илк марта кетма-кет 3 та ўйинда пенальтидан гол урди.

Умумий олганда Мадрид клуби танаффусдан кейин 8 та ўйинда 4 маротаба пенальтидан гол урди. Шулардан 3 тасини Серхио Рамос бехато амалга оширган бўлса, «Алавес»га қарши ўйинда Бензема бу ишни бажарди.

«Реал» 35-турдан кейин 80 очко билан мусобақа жадвалида пешқадамлик қилмоқда. Жамоа 2-ўринда бораётган «Барселона»дан 4 очкога (76) илгарилаб кетган.