Навоий вилояти Навбаҳор туманида амакисининг 5 ёшли ўгай қизини ва унинг онасини пичоқлаган 16 ёшли ўсмир қўлга олинди. Бу ҳақда ИИБ ахборот хизмати хабар берди.
Маълумотларга кўра, 8 июнь куни Зарафшон шаҳрида туғилган 16 ёшли Б.Қ. ота-онаси билан биргаликда Навбаҳор туманида истиқомат қилувчи бобосининг уйига меҳмондорчиликка борган. Б.Қ. амакисининг 5 ёшли ўгай қизи М.А.нинг ошхона пичоғи билан бўйин соҳасига уриб, қасддан ўлдирган. Шундан сўнг у воқеага тасодифан гувоҳ бўлган М.А.нинг онаси (1988 йилда туғилган) М.Д.га ҳам қўлидаги пичоқ билан бир неча маротаба тан-жароҳати етказиб, воқеа жойидан яширинган. Айни пайда жабрланувчи М.Д. туман тиббиёт бирлашмасининг жонлантириш бўлимига ётқизилган.
«Оиладаги носоғлом муҳит, руҳият ва онгнинг мўртлиги, меҳрсизлик ҳамда итоатсизлик қонли зўравонликнинг юзага келишига сабаб бўлди. Шуни алоҳида таъкидлаш лозимки, ота-онанинг фарзанд тарбиясидаги эътиборсизлиги 5 ёшли қизалоқни қурбонга айлантирди. Ахлоқий ҳамда жисмоний тарбиясизлик ҳар қандай жиноятнинг бош омилидир. Гумонланувчининг жазодан қочишга уриниши, қотилликда ўзини айбдор ҳис этмаслиги уни жавобгарликдан озод этмайди», — дейди вилоят ИИБ бошлиғининг биринчи ўринбосари, полковник И.Тиллаев.
Навоий вилояти ИИБ ЖҚБ ходимлари томонидан олиб борилган тезкор саъй-ҳаракатлар натижасида гумонланувчи шу куннинг ўзидаёқ қўлга олинган.
