Польшадаги ўзбекистонликларни олиб келиш бўйича чартер рейс амалга оширилади

Транспорт вазирлиги ахборот хизмати Польшадаги ўзбекистонликларни Тошкентга олиб келиш бўйича чартер рейс амалга оширилишини хабар қилди.

Хабарга кўра, Республика махсус комиссияси қарорига мувофиқ, Польшадаги Ўзбекистон фуқароларини олиб келиш мақсадида 13 июль куни Варшава—Тошкент—Рига йўналишида чартер рейснинг парвози амалга оширилади.

Ушбу парвоз SmartLynx Airlines авиакомпанияси томонидан бажарилади.

Эслатиб ўтамиз, 13 майдан 24 майгача хориждаги ўзбекистонликларни олиб келиш учун 12 та рейс амалга ошириш белгиланган ва режага асосан амалга оширилганди. 25—31 май кунлари 8 та чартер рейс орқали Россия ва Туркиядан жами 2118 нафар фуқаро Ўзбекистонга олиб келиниши хабар қилинганди. Шунингдек, 1—7 июнь кунлари хориждаги ўзбекистонликларни олиб келиш учун 9 та чартер қатнови, 8—21 июнь кунлари оралиғида 20 та чартер рейс амалга оширилган. 22 июндан 5 июлгача 21 та чартер рейсда хориждаги ўзбекистонликлар олиб келинди.

Республика махсус комиссияси сўнгги икки ҳафтага режалаштирилган чартер рейслар жадвалини қайта кўриб чиқиб, бир қанча рейсларни бекор қилган.