Смартфонни алмаштирамиз. Аппаратнинг тез орада «ўлишини» билдирувчи асосий белгилар

Вақт ўтиши билан ҳар қандай смартфон ёмонроқ ишлашни бошлайди. Кўпинча ўзгаришлар босқичма-босқич содир бўлгани сабаб фойдаланувчи унга ўрганиб қолади. Бироқ аппаратни янгисига алмаштириш кераклигини кўрсатувчи бир неча аниқ белгилар бор. «RG.ru» бу борадаги маълумотларни тўплаб тақдим этди.

Батареянинг шишиб қолиб, орқа қопқоқни бироз юқорига кўтариб чиқиши — бу смартфон хизматини ўтаб бўлганининг аниқ белгиси. Бу каби қурилмани қутига солиб, сервис марказга олиб бориш керак — ундан аниқ фойдаланиб бўлмайди. Аккумулятор исталган вақтда ёниб кетиши мумкин.

Экрандаги чизиқлар — бу ҳам смартфонни дарҳол сотиш ёки қимматга таъмирлаш кераклигини англатади. Бу каби чизиқлар кўп бўлиши мумкин ва уларнинг барчаси деярли яхшигина таъмир талаб қилади.

Одатдаги иловалар секин очилади ва хатолик юзага келади. Бу каби илова битта бўлса, қўрқинчли эмас — дастурчилар янги версияда бирор хатоликка йўл қўйган бўлиши мумкин. Аммо бу каби муаммолар кўп кузатилса, аппаратни заводдан чиққандаги созламаларига қайтариш ва сотиб юбориш керак.

Тинч турганда кучли қизиб кетиши — бу ҳам хавотирли белги. Бу процессор бирор-бир кераксиз ишни бажараётганини ёки батарея «чарчаганини» билдириши мумкин.

Тўсатдан ўчиб қолиши ва ёниши — смартфондан энди фойдаланишни бошлаган одам ҳам қурилмани алмаштириш лозимлигини англайди. Албатта, бу каби режимда у бироз муддат ишлаб бериши мумкиндир, бироқ ҳеч ким буни билмайди ва кафолат бермайди. Ундан кўра, маълумотларни йўқотиб қўйиш бўйича таваккал қилмасдан, уни янгисига алмаштирган яхши.

Қўл билан босилса ҳам ишламайдиган ёки бошқа жойга кириб кетадиган сенсорли экран — смартфон «ўлими» яқинлигининг аниқ белгиларидан бири. Қурилма бу каби ишласа ҳам бирор фойда келтириши даргумон.

Автономлигининг камайганини ҳам ҳар қандай фойдаланувчи сеза олади. Бунга одатда батареянинг кучсизлангани сабаб бўлади.

Бундан ташқари, микрофоннинг ўчиб қолиши ёки суратлар сифатининг тушиб кетиши ҳам хавотирли белгилардан ҳисобланади. Ушбу белгилар тўғридан-тўғри смартфон «ўлими»дан далолат бермаса ҳам, ёрқин сингалларнинг дастлабки аломатлари бўлиши мумкин.

Аввалроқ смартфон аккумуляторини «ўлдириб қўймаслик» учун нималарга эътибор қаратиш кераклиги тўғрисида бир қатор маълумотлар берилган эди.