Маълумки, жорий йилнинг 31 январь куни Президент Шавкат Мирзиёев бир қатор илм-фан вакиллари билан ўтказилган учрашувда Давлат геология ва минерал ресурслар қўмитаси тизимида Геология фанлари университетини ташкил қилиш ташаббусини илгари сурган эди. 2020 йил 8 июнь куни эса ана шу ташаббуснинг натижаси ўлароқ «Давлат геология ва минерал ресурслар қўмитаси тизимида Геология фанлари университети фаолиятини ташкил этиш чора-тадбирлари тўғрисида»ги Президент қарори имзоланди.
Айни пайда бошқа университетлар қатори, янги университетга ҳам бакалавриат ва магистратура босқичлари учун қабул эълон қилинган. «Daryo.uz» қабул жараёнларига тайёргарлик, шунингдек, университетнинг келгусидаги режалари, мақсад ва вазифалари ҳақида тўлиқроқ маълумот олиш ниятида Давлат геология ва минерал ресурслар кўмитаси раиси, Геология фанлари университети ректори Бобир Исламов билан суҳбат ўтказди.
Айтингчи, айнан геология йўналишида алоҳида университетнинг бўлиши қанчалик муҳим ва бизда бунга шароит етарлими?
Кўпчилик билмаса керак, Ўзбекистон табиий бойликлар захираси бўйича кучли 10 талик давлатлар қаторига киради. Мамлакатда 73 турдаги фойдали қазилма захирасига эга 2 мингдан ортиқ конлар бор. Кўриниб турибдики, бизда деярли барча ер ости ва ер усти бойликлари мавжуд. Бироқ бу бойликларни аниқлаш, топиш ва фойдаланишга топшириш, юртимиз тараққиёти йўлида ишлатиш учун етарлича билим ва тафаккур, замонавий технологиялар ва уларни ишлата оладиган малакали кадрлар зарур. Айни пайтда Ўзбекистонда аниқланган конларнинг 437 таси ўзлаштирилмаган, қидирув ишларига жалб қилинган техникаларнинг 70 фоизи эскирган. Бу соҳада ютуқлардан кўра муаммоларимиз кўпроқ экани ва ушбу йўналишдаги алоҳида университетнинг бўлиши қанчалик катта аҳамиятга эга эканини яққол кўрсатиб турибди. Геологиямизга инвестициялар жалб қилиб, маҳсулотни қайта ишлаш борасидаги аҳволни ҳам кўнгилдагидек деб бўлмайди. Бизда бу йўналиш йиллар давомида ислоҳотлардан четда қолиб кетгандек туюларди менга. Чунки етарлича имконият ва салоҳиятга эга бўлишимизга қарамасдан улардан максимал фойдалана олмаяпмиз. Ҳозир ҳам 111 та истиқболли коннинг атиги 14 тасида тўғридан-тўғри хорижий инвестициялар иштирокида 39 млн долларлик 6 та лойиҳа амалга ошириляпти, холос. Биздаги имкониятга таққослаганда бу жуда кам. Иқтисодиётни минерал ресурслар билан мунтазам таъминлаш, геология тармоғимизга инвесторларни кўпроқ жалб қилиш учун аввало ўзимиз бунга тайёр туришимиз, яхши кадрларимиз бўлиши керак.
Ўтган асрда ўзбек халқи бунинг уддасидан чиққанди. Иккинчи жаҳон уруши ва ундан кейинги йилларда геология, янги конларни излаб топиш ва фойдаланишга топшириш борасида мақтанса арзийдиган натижаларга эришганмиз. Бир сафар уддаладикми, нега энди иккинчи марта қила олмас эканмиз? Маълум муддат кадрлар бўшлиғи пайдо бўлиб қолганини тушунаман. Лекин энди тарихдаги ютуқларимизга яраша келажак яратадиган пайт келди. Давлат раҳбарининг бунга алоҳида эътибор қаратаётгани мени қувонтирди.
Янги университет фаолиятини кандай тасаввур қиляпсиз? Умуман, қабул ва таълим жараёни бўйича аниқ режалар борми?
Янги ташкил этилаётган университет геология йўналишида таълим, илм-фан ва амалиётнинг интеграциясини ўзида мужассам этган ва соҳамизда малакали кадрлар тайёрлаш, долзарб илмий-тадқиқотлар ўтказиш, натижаларини амалиётга жорий этиш ва якунида Ўзбекистоннинг халқаро миқёсдаги ўрнини мустаҳкамлашга хизмат қилиши керак.
Бу қарорда санаб ўтилган бир қатор топшириқларда ҳам ўз ифодасини топган. Улардан айримларига эътиборингизни қаратмоқчиман.
Жумладан, Геология фанлари университети фаолиятини йўлга қўйиш билан боғлиқ ташкилий масалаларини ўз вақтида ва сифатли амалга ошириш жуда муҳим. Фан дастурлари ва ўқув режаларини ишлаб чиқишда эса етакчи хорижий таълим муассасалари, жумладан, Санкт-Петербург кончилик университети тажрибасидан фойдаланишни режа қилганмиз. 1 сентябргача университетнинг профессор-ўқитувчилар таркибини шакллантириш, фан дастурлари ва ўқув режаларини ишлаб чиқиш ишларини якунлашимиз керак.
Яна бир муҳим жиҳатга эътиборингизни қаратмоқчиман. Геология фанлари университети таркибида Санкт-Петербург кончилик университетининг махсус умумтаълим ва базавий техник фанларини ўқитишга ихтисослашган Бошланғич муҳандислик тайёрлаш марказини очишимиз зарур. Бу масалада Олий ва ўрта махсус таълим вазирлиги билан биргаликда иш ташкил этиш лозим.
Режамизда университет таркибида Геоинновацион технологиялар марказини очиш масаласи ҳам бор. Уни жиҳозлаш учун жами 1925 та замонавий ускуналар ва инвентарлар рўйхати тасдиқланди. Уларнинг умумий қиймати 14 млн долларга яқин бўлиб, бунга Навоий ва Олмалиқ кон-металлургия комбинатларининг ҳомийлик маблағлари жалб этилиши кўзда тутилган.
Бу йилги қабул учун қанча квота ажратилган?
2020/2021 ўқув йили учун университетга 6 та таълим йўналишлари ва 4 та мутахассисликлар бўйича 240 та квота ажратилди. Шундан 200 таси – бакалавриат, 40 таси – магистратура бўйича. Битирувчилар Давлат геология ва минерал ресурслар қўмитаси тизимидаги корхона ва ташкилотларда иш билан таъминланади. Ушбу жадвалда ҳаммаси батафсил келтирилган:
Бундан ташқари, қабул жараёни яна-да кулайроқ бўлиши учун «Call-марказ» ташкил қилдик, мутахассислар ажратдик. Лекин абитуриентларни онлайн рўйхатдан ўтказишга бакалаврит учун жорий йилнинг 20 июлигача, магистратура учун эса 30 июлга қадар муддат белгиланганини эслатиб ўтмоқчиман.
Бу йил биринчи талабаларимизни қабул қиламиз. Шу сабабли ҳаяжонимиз ҳам, масъулиятимиз ҳам етарлича. Геология фанлари университети келгусида соҳага юқори малакали, илмий салоҳиятли мутахассисларни тайёрлаб бериши, юртимизда янги конларнинг очилиши ва табиий бойликларимизнинг халқимиз манфаати учун хизмат қилишига ўз ҳиссасини қўшади деган умиддаман.
Абитуриентларга эса имтиҳонларда омад тилаб қоламан!
Реклама ҳуқуқи асосида.
Изоҳ (0)