Ma’lumki, joriy yilning 31-yanvar kuni Prezident Shavkat Mirziyoyev bir qator ilm-fan vakillari bilan o‘tkazilgan uchrashuvda Davlat geologiya va mineral resurslar qo‘mitasi tizimida Geologiya fanlari universitetini tashkil qilish tashabbusini ilgari surgan edi. 2020-yil 8-iyun kuni esa ana shu tashabbusning natijasi o‘laroq “Davlat geologiya va mineral resurslar qo‘mitasi tizimida Geologiya fanlari universiteti faoliyatini tashkil etish chora-tadbirlari to‘g‘risida”gi Prezident qarori imzolandi.
Ayni payda boshqa universitetlar qatori, yangi universitetga ham bakalavriat va magistratura bosqichlari uchun qabul e’lon qilingan. “Daryo.uz” qabul jarayonlariga tayyorgarlik, shuningdek, universitetning kelgusidagi rejalari, maqsad va vazifalari haqida to‘liqroq ma’lumot olish niyatida Davlat geologiya va mineral resurslar ko‘mitasi raisi, Geologiya fanlari universiteti rektori Bobir Islamov bilan suhbat o‘tkazdi.
Aytingchi, aynan geologiya yo‘nalishida alohida universitetning bo‘lishi qanchalik muhim va bizda bunga sharoit yetarlimi?
Ko‘pchilik bilmasa kerak, O‘zbekiston tabiiy boyliklar zaxirasi bo‘yicha kuchli 10 talik davlatlar qatoriga kiradi. Mamlakatda 73 turdagi foydali qazilma zaxirasiga ega 2 mingdan ortiq konlar bor. Ko‘rinib turibdiki, bizda deyarli barcha yer osti va yer usti boyliklari mavjud. Biroq bu boyliklarni aniqlash, topish va foydalanishga topshirish, yurtimiz taraqqiyoti yo‘lida ishlatish uchun yetarlicha bilim va tafakkur, zamonaviy texnologiyalar va ularni ishlata oladigan malakali kadrlar zarur. Ayni paytda O‘zbekistonda aniqlangan konlarning 437 tasi o‘zlashtirilmagan, qidiruv ishlariga jalb qilingan texnikalarning 70 foizi eskirgan. Bu sohada yutuqlardan ko‘ra muammolarimiz ko‘proq ekani va ushbu yo‘nalishdagi alohida universitetning bo‘lishi qanchalik katta ahamiyatga ega ekanini yaqqol ko‘rsatib turibdi. Geologiyamizga investitsiyalar jalb qilib, mahsulotni qayta ishlash borasidagi ahvolni ham ko‘ngildagidek deb bo‘lmaydi. Bizda bu yo‘nalish yillar davomida islohotlardan chetda qolib ketgandek tuyulardi menga. Chunki yetarlicha imkoniyat va salohiyatga ega bo‘lishimizga qaramasdan ulardan maksimal foydalana olmayapmiz. Hozir ham 111 ta istiqbolli konning atigi 14 tasida to‘g‘ridan to‘g‘ri xorijiy investitsiyalar ishtirokida 39 mln dollarlik 6 ta loyiha amalga oshirilyapti, xolos. Bizdagi imkoniyatga taqqoslaganda bu juda kam. Iqtisodiyotni mineral resurslar bilan muntazam ta’minlash, geologiya tarmog‘imizga investorlarni ko‘proq jalb qilish uchun avvalo o‘zimiz bunga tayyor turishimiz, yaxshi kadrlarimiz bo‘lishi kerak.
O‘tgan asrda o‘zbek xalqi buning uddasidan chiqqandi. Ikkinchi jahon urushi va undan keyingi yillarda geologiya, yangi konlarni izlab topish va foydalanishga topshirish borasida maqtansa arziydigan natijalarga erishganmiz. Bir safar uddaladikmi, nega endi ikkinchi marta qila olmas ekanmiz? Ma’lum muddat kadrlar bo‘shlig‘i paydo bo‘lib qolganini tushunaman. Lekin endi tarixdagi yutuqlarimizga yarasha kelajak yaratadigan payt keldi. Davlat rahbarining bunga alohida e’tibor qaratayotgani meni quvontirdi.
Yangi universitet faoliyatini kanday tasavvur qilyapsiz? Umuman, qabul va ta’lim jarayoni bo‘yicha aniq rejalar bormi?
Yangi tashkil etilayotgan universitet geologiya yo‘nalishida ta’lim, ilm-fan va amaliyotning integratsiyasini o‘zida mujassam etgan va sohamizda malakali kadrlar tayyorlash, dolzarb ilmiy-tadqiqotlar o‘tkazish, natijalarini amaliyotga joriy etish va yakunida O‘zbekistonning xalqaro miqyosdagi o‘rnini mustahkamlashga xizmat qilishi kerak.
Bu qarorda sanab o‘tilgan bir qator topshiriqlarda ham o‘z ifodasini topgan. Ulardan ayrimlariga e’tiboringizni qaratmoqchiman.
Jumladan, Geologiya fanlari universiteti faoliyatini yo‘lga qo‘yish bilan bog‘liq tashkiliy masalalarini o‘z vaqtida va sifatli amalga oshirish juda muhim. Fan dasturlari va o‘quv rejalarini ishlab chiqishda esa yetakchi xorijiy ta’lim muassasalari, jumladan, Sankt-Peterburg konchilik universiteti tajribasidan foydalanishni reja qilganmiz. 1-sentabrgacha universitetning professor-o‘qituvchilar tarkibini shakllantirish, fan dasturlari va o‘quv rejalarini ishlab chiqish ishlarini yakunlashimiz kerak.
Yana bir muhim jihatga e’tiboringizni qaratmoqchiman. Geologiya fanlari universiteti tarkibida Sankt-Peterburg konchilik universitetining maxsus umumta’lim va bazaviy texnik fanlarini o‘qitishga ixtisoslashgan Boshlang‘ich muhandislik tayyorlash markazini ochishimiz zarur. Bu masalada Oliy va o‘rta maxsus ta’lim vazirligi bilan birgalikda ish tashkil etish lozim.
Rejamizda universitet tarkibida Geoinnovatsion texnologiyalar markazini ochish masalasi ham bor. Uni jihozlash uchun jami 1925 ta zamonaviy uskunalar va inventarlar ro‘yxati tasdiqlandi. Ularning umumiy qiymati 14 mln dollarga yaqin bo‘lib, bunga Navoiy va Olmaliq kon-metallurgiya kombinatlarining homiylik mablag‘lari jalb etilishi ko‘zda tutilgan.
Bu yilgi qabul uchun qancha kvota ajratilgan?
2020/2021 o‘quv yili uchun universitetga 6 ta ta’lim yo‘nalishlari va 4 ta mutaxassisliklar bo‘yicha 240 ta kvota ajratildi. Shundan 200 tasi – bakalavriat, 40 tasi – magistratura bo‘yicha. Bitiruvchilar Davlat geologiya va mineral resurslar qo‘mitasi tizimidagi korxona va tashkilotlarda ish bilan ta’minlanadi. Ushbu jadvalda hammasi batafsil keltirilgan:
Bundan tashqari, qabul jarayoni yana-da kulayroq bo‘lishi uchun “Call-markaz” tashkil qildik, mutaxassislar ajratdik. Lekin abituriyentlarni onlayn ro‘yxatdan o‘tkazishga bakalavrit uchun joriy yilning 20-iyuligacha, magistratura uchun esa 30-iyulga qadar muddat belgilanganini eslatib o‘tmoqchiman.
Bu yil birinchi talabalarimizni qabul qilamiz. Shu sababli hayajonimiz ham, mas’uliyatimiz ham yetarlicha. Geologiya fanlari universiteti kelgusida sohaga yuqori malakali, ilmiy salohiyatli mutaxassislarni tayyorlab berishi, yurtimizda yangi konlarning ochilishi va tabiiy boyliklarimizning xalqimiz manfaati uchun xizmat qilishiga o‘z hissasini qo‘shadi degan umiddaman.
Abituriyentlarga esa imtihonlarda omad tilab qolaman!
Reklama huquqi asosida.
Izoh (0)