Бухорода вояга етмаган фарзандлари учун алимент тўламай келган она ўз номидаги уйни ўғилларидан бирининг номига расмийлаштириб берди. Бу ҳақда «Дарё»га МИБ Бухоро вилоят бошқармаси ахборот хизмати маълум қилди.
Мажбурий ижро бюроси Қоровулбозор тумани бўлими қарздор Б.А. дан ундирувчи С.Н. фойдасига иш юритувида фуқаролик ишлари бўйича Когон туманлараро судининг 2010 йил 25 июлдаги икки нафар вояга етмаган фарзандининг моддий таъминоти учун ойлик иш ҳақи ва барча турдаги даромадларининг 1/3 қисми миқдорида алимент ундириш тўғрисидаги ижро ҳужжати мавжуд.
Қарздор алимент мажбуриятларини тўлашдан бўйин товлаб келганлиги сабабли жиноят ишлари бўйича Қоровулбозор туман судининг 2016 йил 15 июль ҳукмига асосан айбдор деб топилган ва унга тегишли жазо тайинланган.
Мажбурий ижро ҳаракатлари қарздор Б.А.га алимент тўлаш тартиби бўйича ҳуқуқ ва мажбуриятлари тушунтирилган ҳамда жавобгарлик қўлланилиши мумкинлиги тўғрисида огоҳлантирилган.
«Қарздор Б.А. бундан ўзига тегишли хулоса чиқариб, алимент ижро ҳужжатига асосан ҳисобланган 71 миллион 247 минг сўмлик алимент тўловларидан қарздорлиги учун ўғли Р.Ш. номига Қоровулбозор тумани «Тинчлик» МФЙ Алишер Навоий кўчасидаги хонадонни нотариус иштирокида расмийлаштириб берди», — дейилади хабар.
Ижро ҳужжати «Суд ҳужжатлари ва бошқа органлар ҳужжатлари тўғрисида»ги қонуннинг 41-моддасига асосан амалда тамомланган.
Аввал МИБ Тошкент шаҳрида 126 миллион сўмлик ҳамда 110 миллион сўмлик, Фарғонада карантин шароитида 38 миллион сўмлик ва Наманганда 40 миллион сўмлик алимент пулларини ундириб бергани, Андижонда 2 нафар болани ота қарамоғидан она тарбиясига олиб бергани тўғрисида хабарлар берилган эди.
Изоҳ (0)