Самарқанд ҳокими Эркинжон Турдимов ҳокимликда бўлиб ўтган йиғилишда коронавирус сабаб вилоятда вазият яхши эмаслигини билдирди. Бу ҳақда вилоят ҳокимлиги ахборот хизматига таяниб, «Дарё» мухбири Фарҳод Норбўтаев хабар берди.
«Кундан кунга касалланганлар сони кўпаймоқда. Кўпчилик фуқароларимиз карантин қоидаларини қўпол равишда бузишга ўтди. Бу яхшиликка олиб келмайди, — деди вилоят ҳокими Эркинжон Турдимов. — Бугун ҳам (7 июль куни назарда тутилмоқда) битта ўлим ҳолати қайд этилди. Ўлим ҳолати вилоятда учтага етди. Бу яхшиликдан далолат бермайди. Ҳамма карантин қоидаларига риоя қилиши шарт, мажбур. Шу ҳолатда давом этсак, Самарқанд шаҳрининг қизил ҳудудга ўтиш хавфи катта. Чекловлар қатъий бўлади. Биз буни жиловлай олмай қоламиз. Кўп нарса ўлимга бориб тақалади. Бугун биз хулоса қилиб олишимиз керак».
https://www.youtube.com/watch?v=HhNOPF5iFQ0
Эркинжон Турдимовнинг маълум қилишича, вилоятда коронавирусдан касалланганлар сони бугунги кунда 495 нафарни ташкил қилмоқда.
Таъкидланишича, энг ёмон аҳвол Самарқанд шаҳрида бўлиб, бу ерда 162 нафар бемор бор. Шулардан 121 нафари соғайган. Пастдарғом тумани 29 нафар бемор сабаб, «яшил» ҳудуддан «сариқ» ҳудудга ўтказилган. Самарқанд туманида эса 44 нафар бемор бўлиб, 35 нафари соғайган. Шунингдек, Нарпай туманида 11 нафар беморнинг 6 нафари, Каттақўрғон туманидаги 14 нафар беморнинг 10 нафари, Пайариқ туманидаги 37 нафар беморнинг 33 нафари соғайган.
Эслатиб ўтамиз, Ўзбекистонда 6 июль соат 23:30 дан 7 июль соат 23:30 га қадар коронавирусга чалинганлар сони 308 кишига ошди. Ўзбекистонда кетма-кет 5-кун кунлик касалланганлар сони 300 нафардан ошмоқда. Янги ҳолатлардан сўнг Ўзбекистонда коронавирусга чалинганларнинг умумий сони 10 670 нафарга етди.
Изоҳ (0)