Бугун,

  • USD 11095.31
  • RUB 173.84
  • EUR 10772.44

Ўзбекистон соғлиқни сақлаш вазири Алишер Шодмоновнинг маълум қилишича, мамлакатда коронавирус авж оладиган бўлса, тиббиёт тизими оғир вазиятга тушиб, бошқа йўналишларда тиббий хизматларни кўрсатиш имконсиз бўлиб қолиши мумкин. Бу ҳақда у «Ўзбекистон 24» телеканалига берган интервьюсида маълум қилган.

Вазирнинг сўзларига кўра, мамлакатда мавжуд юқумли касалликлар шифохоналарининг барчаси айни пайтда ишлаб турибди. Бундан ташқари, умумий йўналишдаги шифохоналарнинг йўналишини ўзгартириб, юқумли касалликларни даволашга мослаштирилган. Булар билан бир қаторда, шошилинч ёрдам хизмати, туғруқ, ҳомиладорларга ёрдам, ижтимоий йўналишларга хизмат кўрсатиш ҳам тўла таъминланмоқда.

«Лекин касаллик авж оладиган бўлса, тиббиёт тизими оғир вазиятга тушиб, бошқа йўналишдаги ёрдамлар тўхтаб қолиши мумкин. Шунинг учун ҳозир ҳаммамиз тенг ҳаракат қилиб, касаллик тарқалиб кетишининг олдини олиб, оғир беморлар сонини, шифохоналарга тушадиганларни камайтиришимиз керак», — деди Алишер Шодмонов.

Унинг қайд этишича, ҳозирги кунда Тошкент шаҳрида 14 та тиббиёт муассасасида коронавирусга чалинган беморларга ёрдам кўрсатилмоқда, яна 4 та шифохона касалликка гумони борларга хизмат кўрсатишга мослаштирилган. Республика бўйича ҳар бир вилоятда камида иккитадан шифохона юқумли касалликларни даволашга тайёрланган.

«Вилоятлардаги шифохоналар 110 нафаргача беморга (бу ҳали кўп эмас) тўла ёрдам бериш имкониятига эга. Аммо бошқа мамлакатларни кўриб турибмизки, беморларни даволаш учун спорт заллари, стадионлар, таълим муассасалари, ётоқхоналарда жой қилинмоқда. Улар ихтисослашмаган, ёрдам бериш имконияти, асбоб-ускунаси йўқ. Беморлар фақат вақтинча олиб келиб ётқизиляпти» , — дея таъкидлади соғлиқни сақлаш вазири.

Унинг қайд этишича, Ўзбекистонда бундай ҳолатнинг олдини олиш учун ҳозир ҳаракатларни кучайтириш, вазиятни тўғри тушуниб, карантинни қаттиқ ушлаш керак.

Аввалроқ Алишер Шодмонов Ўзбекистонда коронавирус ҳали энг юқори чўққисига чиқмаганини айтганди.

Эслатиб ўтамиз, Ўзбекистонда коронавирус билан боғлиқ вазиятнинг кескинлашаётгани сабабли 10 июлдан 1 августгача мамлакатда қатъий карантин чоралари жорий қилинади. 10 июлдан тўйлар, оилавий ва оммавий тадбирлар тақиқланади, автотранспорт ҳаракати чекланади, буюм бозорлари ва болалар боғчалари ёпилади, халқаро авиақатновлар икки бараварга қисқартирилади, коронавирусдан уй шароитида даволанаётганларга тиббий ёрдам бериш учун мобил гуруҳлар ташкил этилади, Ўзбекистоннинг барча ҳудудлари эпидемиологик тоифаси «қизил» бўлади.

Ўзбекистонда 2020 йил 8 июль соат 17:30 ҳолатига кўра, коронавирус инфекцияси қайд этилган беморлар сони 144 кишига кўпайиб, 10 982 нафарни ташкил этмоқда. Мамлакатда айни пайтгача коронавирус инфекциясига чалинган 6888 нафар фуқаро соғайган, коронавирусдан вафот этган беморлар сони эса 42 нафарга етди.

Изоҳ
Asosiy yangiliklar
Маҳаллий
Виртуал карталар нима ва улардан қандай қилиб тўғри фойдаланиш мумкин?
Дунё
Twitter офисида ходимлар учун каравотлар пайдо бўлди, Илон Маск аввалроқ меъёридан ортиқча иш бўлиши ҳақида огоҳлантирганди
Маҳаллий
Хоразмда икки киши ис газидан вафот этди