Фарғона вилояти коронавирусга қарши курашда кўмак бериш учун Қирғизистоннинг Боткен вилоятига гуманитар ёрдам юборди. Бу ҳақда Қирғизистоннинг коронавирусга қарши кураш бўйича тезкор штаби маълум қилди.
«Gazeta.uz»нинг ёзишича, Фарғона вилояти ҳокимлиги матбуот хизмати ушбу маълумотни тасдиқлади ва Боткенга ёрдам биринчи марта берилмаётганини таъкидлади.
«Биз Қирғизистоннинг Ўзбекистон билан қўшни бўлган вилоятларида коронавирус тарқалаётганидан хавотирдамиз», — деди Фарғона вилояти ҳокимлиги матбуот котиби Муҳаммаджон Обидов.
Матбуот хизмати раҳбарининг таъкидлашича, қирғизларга COVID-19 учун 5000 та тест-тизими ва 13 турдаги тиббий ускуналар, шунингдек, коронавирус билан курашиш учун маблағлар топширилди.
Қирғизистон тезкор штаб-квартираси маълумотларига кўра, Фарғона вилоятидан чегара ҳудудига кўрсатилган ёрдам қиймати 6,3 миллион сом (81 минг доллар)ни ташкил қилади.
Хабар берилишича, ёрдам Фарғона вилояти ҳокими Шуҳрат Ғаниев ва Қирғизистон ҳукуматининг Боткен вилоятидаги ваколатли вакили Алишер Абдраҳмонов ўртасида ўтказилган музокаралар натижасида амалга оширилди.
«Боткен вилояти раҳбарияти Ўзбекистон Республикаси Президенти ва Фарғона вилояти раҳбариятига, бутун ўзбек халқига қийин вазиятда кўрсатган ёрдамлари учун чуқур миннатдорчилик билдиради», — дейилади тезкор штаб хабарида.
Қирғизистонда 7 июль ҳолатига кўра, COVID-19 билан касалланганлар сони 8141 кишига етди, уларнинг 99 нафари вирус қурбонига айланган. Ҳозирга қадар 2916 нафар бемор даволанган.
Аввалроқ Ўзбекистон Қирғизистонга навбатдаги инсонпарварлик ёрдамини юборганди.
Изоҳ (0)