Қашқадарё вилоятининг Қарши шаҳри ҳокими Нормўмин Холбоев ёнилғи қуйиш шохобчасининг муҳофаза майдонидан хусусий клиника қуриш учун ер майдони ажратиб берди. Бу ҳақда «Дарё»га шикоят қилган тадбиркор Бахтиёр Раҳимовнинг айтишича, ҳоким қарори билан ажратилган ер майдонида қад ростлаётган хусусий клиника беморлари заправканинг 80 минг литрдан ортиқ ёнилғи сақланадиган омбори ёнида даволанишига тўғри келади. Бу эса беморлар ҳаётига катта хавф туғдиради.
«Хусусий клиникага даволаниш мақсадида ётган беморлар спортчи эмас-ку, ёнилғи қуйиш шохобчаси омборида содир бўлиши мумкин бўлган фавқулодда ҳолатларда югуриб, кўчага чиқишга улгурса, — дейди «Таъминот савдо сервис» МЧЖ раҳбарлигидаги автомобилларга ёнилғи қуйиш шохобчаси мулкдори. — Қолаверса, хусусий клиника муҳофаза майдонида қурилаётганлиги сабабли ёнилғи сақловчи омборимизга ўт ўчириш машиналари кириб-чиқиши учун йўл қолмаяпти».
Маълум қилинишича, Бахтиёр Раҳимов раҳбарлигидаги автомобилларга ёнилғи қуйиш шохобчасининг муҳофаза майдонида қад ростлаётган Artro-Med хусусий клиникаси ҳар икки томондан ҳам заправкалар билан ўраб олинган.
«Янги қурилаётган хусусий клиника чап томонда бензин ‘аправка билан, ўнгдан эса газ заправка билан ўраб олинган, — дейди Бахтиёр Раҳимов. — Қолаверса, собиқ ҳоким Жамшид Фозилов даврида тадбиркор учун ажратиб берилган ер майдони ҳақидаги қарор Қарши шаҳар Маъмурий судининг 2019 йил 30 декабрдаги қарори билан бекор қилинган. Боиси, шаҳар ҳокимининг 2019 йил 4 апрелдаги қарорига кўра, хусусий клиника учун ажратилган ер майдони шаҳар ҳокимининг 2018 йил 26 ноябрдаги қарори билан фуқаро Мирзаев Мансурга иссиқхона қуриш учун ажратилган ер майдони ичига кирганлиги аниқланган».
Кузатувларимизга кўра, хусусий клиникани ўнг томондан ўраб турган автомобилларга суюлтирилган газ қуйиш шохобчаси масъуллари ҳудудда клиника қурилаётгани боис бетон ғиштда баланд девор қуриб, хавфсизликни таъминлашга уринмоқда. Бироқ бу девор қай даражада хавфсизликни таъминлайди, буниси номаълум.
Қарши шаҳар Маъмурий судининг 2019 йил 30 декабрдаги ҳал қилув қарорида айтилишича, шаҳарнинг собиқ ҳокими Жамшид Фозилов томонидан имзоланган 2019 йил 4 апрелдаги хусусий клиника қуриш учун ер майдони ажратиш тўғрисидаги қарор шаҳар Қурилиш бўлими томонидан тақдим этилган нотўғри маълумот сабабли чиқарилган бўлиб, айнан шу сабаб суд томонидан бекор қилинган.
Бироқ шаҳарнинг янги ҳокими Нормўмин Холбоев 2020 йил 3 июнь куни собиқ ҳоким Жамшид Фозилов томонидан 2019 йил 4 апрель куни имзоланган ва суд томонидан бекор қилинган қарорни «қонун талабларига мувофиқлаштиряпмиз» деб, яна ёнилғи қуйиш шохобчасининг муҳофаза майдонидан Artro-Med хусусий корхонасига 40 сотих ер ажратиб бериш ҳақида қарор чиқаради.
Ваҳоланки, вилоят бош архитектори Ш.Қурбоновнинг 2020 йил 18 майдаги Қарши шаҳар ҳокимига ёзган билдириш хатида ёнилғи қуйиш шохобчаси уй-жой ва жамоат бинолари, одамлар кўп тўпланадиган масканлардан 60 метр узоқликда бўлиши лозимлиги эслатилган.
Шунингдек, шаҳар Фавқулотда вазиятлар бўлими бошлиғи М.Аҳмедов ҳам 2020 йил 7 майдаги хулосасида Artro-Med хусусий клиникаси ёнилғи қуйиш шохобчаси муҳофаза майдонига кириб борганлигини, ёнғин хавфсизлиги учун орқалиқ масофа қолдирилмаётганлигини маълум қилган. Шунга қарамасдан шаҳар ҳокими хусусий клиника қуриш учун рухсат берган.
Ҳокимнинг ушбу қарори қай даражада асосли эканлигини билиш мақсадида Қарши шаҳар ҳокими Нормўмин Холбоев билан бу ҳақда мулоқот қилдик.
«Мутахассисларимиз вазиятни қайта ўрганиб чиқади ва икки кун ичида батафсил маълумот берилади. Агар янги қурилаётган хусусий клиника ҳақиқатдан ҳам ёнилғи қуйиш шохобчасининг муҳофаза зонасига кирган бўлса, адолатли қарор чиқарилади», — деган ҳоким бир ҳафта вақт ўтса-да, на муаммони ўрганди ва на бизнинг сўровимизга тайинли жавоб қайтарди.
«Айни пайтда хусусий клиника қурилиши якунланмоқда. Клиника биноси ва заправка ўртасида 25 метр масофа қолган. Мен ёнғин хавфсизлиги учун беш метр баландликда девор қурилиб, шу масофа қолса ҳам розиман. Техникалар кириб-чиқиши учун имкон бўлса, бунга ҳам йўқ демаяпман. Аммо хусусий клиника раҳбари ёнилғи сақловчи омборим ёнидан қўшимча бинолар қуриб, беморларнинг дам олиши учун ўриндиқлар ўрнатишни, хуллас заправка тагига қадар кириб келишни мақсад қилган. Хусусий клиника раҳбарининг ‘Менга ҳокимлик томонидан қарор берилган’ дея одамлар ҳаётини хавф остига қўйиши мени хавотирга қўймоқда», — дейди «Таъминот савдо сервис» МЧЖ раҳбарлигидаги автомобилларга ёнилғи қуйиш шохобчаси мулкдори Бахтиёр Раҳимов.
Бахтиёр Раҳимов «Дарё» мухбири билан суҳбати давомида шаҳарнинг янги ҳокими Нормўмин Холбоев дастлаб хусусий клиника раҳбарига заправка олдига тиқилмасликни айтган бўлса-да, бироз муддат ўтгач тескари томонга ўзгарганини ва бўлаётган ноҳақликка жим қараб турганини айтмоқда.
«Дарё» ушбу ҳолат юзасидан Қарши шаҳар ҳокимлигидан тайинли жавоб кутади ва мавзуга қайтади.
Изоҳ (0)