Тошкент вилоятининг Бўстонлиқ туманига 2 июль куни ташкил этилган пресс-тур давомида бош вазир ўринбосари — Туризимни ривожлантириш давлат қўмитаси раиси Азиз Абдуҳакимов Бўстонлиқдаги «дача»ларнинг нарх-навосига танқидий муносабат билдирди, дея хабар бермоқда «Дарё» мухбири.
Азиз Абдуҳакимовнинг таъкидлашича, коронавирус пандемияси билан боғлиқ вазият туфайли бу йил аҳолида чет элга чиқиш имконияти деярли йўқ, Ўзбекистоннинг ўзида ҳордиқ чиқаришга тўғри келади. Шундай жойлардан бири — Бўстонлиқ, бироқ сўнгги йилларда ҳудуддаги дала ҳовлиларда ижара нархи сезиларли ошиб кетган.
«Бўстонлиқдаги дала ҳовлилар авваллари хусусий уйлар эди. Йиллар мобайнида бошқа ҳудудларда яшовчилар, асосан тошкентликлар келиб, бу уйларни сотиб олиб, вилла кўринишига келтирди. Охирги йилларда бу ердаги ‘дача’ларнинг нархи икки баробарга ошиб кетди. 2019 йили ўртача нархи 600-800 минг сўм бўлган жойлар бу йил 1,5-2 миллионга ҳам чиққан. Бундан-да қиммат, бир кеча қолиб дам олиш нархи 10, 15, 20 миллион сўм бўлган жойлар ҳам бор», — деди бош вазир ўринбосари.
Унинг таъкидлашича, нархларнинг бундай ошиши оқибатида аксарият ўзбекистонликлар бу ерларга келиб, дам олишга моддий жиҳатдан қийналмоқда. «Ижтимоий тармоқларда Бўстонлиқда дам олгандан кўра, масалан, Туркияга бориб ҳордиқ чиқариш арзонроққа тушади, деган эътирозли фикрларни ҳам ўқияпмиз», — деди Азиз Абдуҳакимов.
Маълум қилишларича, ҳудуддаги вазиятни ўзгартириш мақсадида Президент кўрсатмасига асосан янги режа ишлаб чиқилган, архитекторлар ва бошқа мутахассислар томонидан «Чорвоқ» туристик зонасининг бош режаси тайёрланган.
«Режага кўра, аҳолига қулай, арзон ва хавфсиз шароитлар яратиб берилади. Шу нуқтаи назардан, бу ерда инфраструктурани ҳам жойига келтириш керак. Йўлларнинг сифатини яхшилаш зарур. Туристик зона бош режасида қайси жойда дам олиш масканлари, қаерда барча дам олиш масканларига хизмат кўрсатувчи умумхўжалик инфратузилмаси барпо этилиши кўрсатилган. Санаторий типдаги дам олиш масканларидан воз кечиб, уч-тўрт қаватли замонавий меҳмонхоналар қуриш кўзда тутилмоқда», — деди у.
Изоҳ (0)