Эпидемиолог нима сабабдан Германияда коронавирус қурбонлари сони камлигини изоҳлади

«Шарите» университети тиббиёт комплекси ҳамда Гарвард университети профессори Тобиас Курт «РБК»га берган интервьюсида Германияда коронавирус қурбонлари сонининг нисбатан кам эканлигини тушунтириб берувчи иккита омил мавжудлигини маълум қилди.

Биринчидан, Германия пандемияга юқори тайёргарлик ҳолатида ёндашган.

«Бизда эпидемияга қарши тайёргарлик кўриш учун вақт бор эди. Бизнинг соғлиқни сақлаш тизимимиз шундоқ ҳам яхши тайёргарлик кўрган бўлса-да, биз уни янада кучлироқ мустаҳкамладик», — дейди Курт.

Эпидемиологнинг таъкидлашича, Жанубий Европа давлатлари, масалан, Италия касаллар сонининг кескин ортишига дуч келган ва уларни даволаш учун тиббиёт муассасаларида жой, хусусан, сунъий нафас олдириш аппаратлари етмай қолган. Бундан ташқари, Германия Европанинг бошқа давлатларидан фарқли ўлароқ вирус тарқалишининг дастлабки босқичидаёқ уни секинлаштиришга муваффақ бўлган, бу эса кексаларнинг касаликка чалинишининг олдини олишга хизмат қилган.

Иккинчидан, қурбонлар сонининг камлигига Германия жамоатчилиги ва маданиятининг ўзига хос шакли сабаб бўлган бўлиши мумкин. Экспертнинг сўзларига кўра, Германияда бир неча авлод вакиллари битта оилада яшаши камдан кам ҳолларда учрайди. «Жанубий Европа давлатларида кексалар кўпинча оиланинг бошқа аъзолари билан бирга яшайди. Табиийки оилада бир киши касалликка чалинса, вируснинг бошқаларга юқиш хавфи ортади, кекса инсонларда эса ўлим хавфи юқори», — дейди профессор.

Куртнинг таъкидлашича, Европа Иттифоқида иқтисодий фаоллик қайта йўлга қўйилгани боис коронавируснинг иккинчи тўлқини юзага келиш эҳтимоллиги юқори, бироқ унинг олдини олиш мумкин. Унинг фикрича, касаллик кўпайишининг олдини олишни учта комплекс чораси мавжуд: инфекцияга чалинганларни аниқлаш ва уларни изоляция қилиш учун тестларни кўпайтириш, касаллар билан алоқа қилганларни аниқлаш учун барча имкониятни ишга солиш ва фуқароларнинг ижтимоий масофаланиш ҳамда шахсий гигиена қоидаларига риоя қилиши.

Жонс Ҳопкинс университети маълумотларига кўра, Германияда коронавирусга чалинганлар сони 197 минг кишидан, вирус қурбонлари сони эса 9 минг кишидан ошган.

Аввалроқ бутун дунёда коронавирус билан касалланганлар сони 11 миллиондан, қурбонлар сони эса 524,5 мингдан ошгани тўғрисида хабар берилганди.