«Улар орасида собиқ ‘замҳоким’лар бор». Бўстонлиқдаги «снос»лар юзасидан бир қатор мансабдорлар қўлга олингани маълум қилинди

Тошкент вилояти Бўстонлиқ туманининг дам олиш ҳудудларида ўзбошимчалик амалга оширилган қурилишлар иши бўйича бир қатор мансабдорлар қўлга олинган.

Бу ҳақда Тошкент вилояти прокурори Салом Самадов 2 июль куни Бўстонлиқ туманига амалга оширилган пресс-тур давомида маълум қилди, дея хабар бермоқда «Дарё» мухбири.

Прокурорнинг таъкидлашича, 2020 йил 11 май ҳолатига кўра Бўстонлиқдаги ноқонуний қурилишлар юзасдиан саккизта жиноят иши қўзғатилган, айни пайтда 10 киши тергов олдида жавоб беряпти.

«Улар орасида маҳалла раиси, ‘Ергеодезкадастр’ ходими, собиқ ҳоким ўринбосарлари, маклерлар бор», — деди прокурор Самадов.

Унинг қайд этишича, ҳозиргача 594 та объект ноқонуний деб топилган, мана шундай ноқонуний тарзда қурилган деб топилган 24 та уйнинг эгалари эса суд жараёнига келмаяпти.

«Сув бўйида, юқори кучланишдаги электр тармоқлари остида қурилган, экология ва йўл муҳофазасига таъсир қиладиган ноқонуний биноларнини барчасини бузиш давом этади», — деди вилоят прокурори.