Самарқанд вилоятида икки кишини ўқишга киритиб қўйишни ваъда қилган икки шахс қўлга олинди. Бу ҳақда «Дарё»га Давлат хавфсизлик хизмати хабар қилди.
Қайд этилишича, ДХХ Самарқанд вилояти бошқармаси ва вилоят ички ишлар бошқармаси ҳамкорлигида ўтказилган тезкор тадбир давомида Самарқанд давлат университети ходими ва 2020/2021-ўқув йили учун қабул комиссияси аъзоси бўлган катта ўқитувчи икки кишини ўқишга киритиб қўйиш учун 6 минг АҚШ доллари олаётган вақтида ушланди.
Ҳозирда аниқланган барча ҳолатлар юзасидан Жиноят кодексининг тегишли моддаларига асосан жиноят иши қўзғатилиб, тергов ҳаракатлари доирасида ушбу ноқонуний ишларга алоқадор бўлган шахсларни аниқлаш бўйича тегишли чора-тадбирлар амалга оширилмоқда.
Аввалроқ Пискентда педагогика университетига ўқишга киритиш учун 3,5 минг доллар олган ўқитувчи, Нукус давлат педагогика институтига ўқишга киритиб қўйиш учун 3 минг доллар олган декан ўринбосари, Тошкентда консерваторияга ўқишга киритиш учун 5 минг доллар олган ўқитувчи, Тошкент давлат аграр университети Андижон филиалига 2 минг долларга ўқишга киритиб қўймоқчи бўлган собиқ ўқитувчи, Наманганда университетга ўқишга киритишни ваъда қилиб, 2,5 минг доллар ва 5 млн сўм талаб қилган фирибгар ўқитувчи қўлга тушгани ҳақида хабарлар берилган эди.
