Давлат хавфсизлик хизмати идоралари томонидан прокуратура ва Ички ишлар органлари билан ҳамкорликда 50 минг доллар пора олган ИИБ майорини қўлга олди. Бу ҳақда ДХХ матбуот хизмати «Дарё»га маълум қилди.
Маълумотларга кўра, Тошкент вилояти Янгийўл тумани ички ишлар бўлимининг майор унвонидаги масъул ходими маҳаллий фуқарони «Чинобод нефть база» МЧЖнинг филиалларидан бирига раҳбарликка тайинланишида ёрдам беришини айтиб, бунинг учун ундан 50 минг АҚШ доллари талаб қилган.
Ҳамкорликда ўтказилган тезкор тадбир давомида ИИБ ходими келишилган пулдан 10 минг АҚШ долларини Тошкент шаҳрида жойлашган Ички ишлар вазирлиги марказий госпитали ёнида олаётган вақтида ушланган.
Ҳозирда аниқланган барча ҳолатлар юзасидан Жиноят кодексининг тегишли моддаларига асосан жиноят иши қўзғатилиб, тергов ҳаракатлари доирасида ушбу ноқонуний ишларга алоқадор бўлган шахсларни аниқлаш бўйича тегишли чора-тадбирлар амалга оширилмоқда.
Аввалроқ ДХХ Тошкент вилоятида ҳарбий қисм майори 3 минг доллар пора билан ушлангани тўғрисида хабар берилганди.
Изоҳ (0)