«Рақобат муҳитига салбий таъсир кўрсатадиган айрим хўжалик юритувчи субъектларга берилган эксклюзив ҳуқуқлар, индивидуал солиқ ва божхона имтиёзлари, преференцияларни бекор қилиш тўғрисида»ги Президент фармони лойиҳаси норматив-ҳуқуқий ҳужжатлар лойиҳалари муҳокамаси порталига жойлаштирилди.
Монополияга қарши курашиш қўмитаси ишлаб чиққан лойиҳада «Ўзметкомбинат»нинг қора металларни, «Ўзиккиламчиранглиметалл»нинг рангли металларни, «Давлатбелгиси»нинг турли хил қоғоз маҳсулотларини ишлаб чиқаришидаги монопол ҳолати ва эксклюзив ҳуқуқлари, «Ўзстандарт» агентлигига тегишли ўлчов воситаларини текшириш ва штрих-кодларни бериш бўйича корхоналари каби монополиялар бекор қилиниши таклиф этилмоқда.
«Ўзметкомбинат» АЖ ва «Ўзиккиламчиранглиметалл» АЖнинг монопсонияси (мутлақ сотиб олувчининг ҳуқуқи) ўрнига унинг таркибидан ихтисослаштирилган пунктларни ажратиш йўли билан қора ва рангли металларнинг парчалари ва чиқиндиларини сотиб олиш бўйича мустақил корхона ташкил этиш кўзда тутилган.
Қўмита янги ташкил этилган корхона томонидан қора ва рангли металларнинг парчалари ва чиқиндиларини фақат биржа савдоларида барча металлдан ишланган буюмларни ишлаб чиқарувчиларнинг хом ашёларга тенг кириши таъминлаган ҳолда сотилишини таклиф этилмоқда.
Шунингдек, ушбу ҳужжатда «Ўзбекипаксаноат», «Ўзёғмойсаноат», «Ўзелтехсаноат», «Паррандасаноат», «Ўзбекистонасаларичилари», картошка ишлаб чиқарувчилар, «Ўзчармсаноат» каби турли бирлашмалар аъзоларига, индивидуал пахта ва тўқимачилик кластерларга ҳамда Халқ банки ва «Микрокредитбанк»ларга бериладиган имтиёз ва преференциялари бекор қилиниши ҳам режалаштирилган.
Фармон лойиҳасида «Биринчи резинотехника заводи» МЧЖга берилган преференцияларни бекор қилиш кўзда тутилмоқда.
2019 йили ҳукумат қарори билан «Биринчи резинотехника заводи» МЧЖ қишлоқ хўжалиги ва автомобиль шиналарининг ягона етказиб берувчиси этиб белгиланган эди. Давлат (бюджет ва корпоратив) буюртмачиларига жамият маҳсулотларини махсус маълумотлар порталида рўйхатдан ўтказиладиган тўғридан-тўғри шартномалар асосида харид қилишга рухсат берилган эди. Мазкур нормани бекор қилиш таклиф этиляпти.
Дарвоқе, «Биринчи резинотехника заводи» МЧЖга Инқирозга қарши курашиш жамғармасидан ҳам 40 миллиард сўмлик ссуда ажратилган.Фармон лойиҳасида, шунингдек, Akfa Medline МЧЖ ва Akfa университетига ҳамда ҳукуматнинг 2020 йил июнь ойидаги қарори билан Textile Technologies Group корхонасига берилган божхона имтиёзларини бекор қилиш таклиф этилган.
Фармон ва қонун лойиҳаларининг муҳокамалари 16 июлга қадар давом этади.
Изоҳ (0)