Коронавирус тарқалишининг олдини олиш бўйича Бухоро вилоят комиссиясининг «Дарё»га хабар беришича, вилоятда 1 июлдан номаълум муддатга қадар жамоат транспорти ва буюм бозорлари фаолияти тўхтатилади.
Таъкидланишича, бунга аҳоли орасида касаллик ортиб бораётгани, Бухоро шаҳри «сариқ» ҳудуд тоифасига киритилганлиги сабаб бўлган.
Маълум қилинишича, кейинги 14 кун давомида аҳоли орасида касалланиш ҳолатлари қайд этилмаса, комиссия қарори билан жамоат транспортлари ҳаракати ва буюм бозорлари фаолиятига рухсат берилади.
Эслатиб ўтамиз, вилоятда аҳоли орасида коронавирусга чалиниш ҳолати 2020 йил 26 июнь куни қайд этилган. Ўзбекистонда 27 июнь соат 23:30 дан 28 июнь соат 23:30 гача коронавирус юқтириб олиш билан боғлиқ 266 та ҳолат аниқланган. Олти кундан буён янги касалланганлар сони 200 нафардан ошмоқда.
Айни дамда мамлакатда коронавирусга чалинганлар сони 8031 кишига етди. 5329 нафар бемор эса инфекциядан фориғ бўлиб, даволаниш кўрсаткичи 66 фоизни ташкил этмоқда. Мамлакатда коронавирус қурбонлари сони 22 нафарга етган. 28 июннинг ўзида икки киши вирус қурбонига айланган.
Изоҳ (0)