O‘zbekistonda koronavirusdan vafot etganlar soni 22 nafarga yetdi

Toshkent shahri Yunusobod tumanida yashovchi 42 yoshli erkak koronavirus infeksiyasi asoratlari oqibatida vafot etdi. Bu haqda Sog‘liqni saqlash vazirligi xabar qildi.

Xabarda qayd etilishicha, Yunusobod tumanida yashovchi 42 yoshli D.X. 2020-yil 20 iyun kuni bosh miya qon aylanishi o‘tkir buzilishi (insult)ning qaytalanishi bilan (2018-yilda birinchi marotaba insult bo‘lgan) o‘ta og‘ir holatda Respublika shoshilinch tibbiy yordam ilmiy markazi reanimatsiya bo‘limiga yotqizilgan.

Bemorda 22-iyun kuni koronavirus aniqlangan. D.X.ga ixtisoslashgan tibbiy yordam ko‘rsatish maqsadida u Toshkent tibbiyot akademiyasining ko‘p tarmoqli klinikasiga o‘tkazilgan. Bemorning ahvoli keskin yomonlashgani sababli sun’iy nafas oldirish apparatiga olingan.

Bemorning davolanishi davomida kunlik ahvoli tajribali shifokorlar tomonidan ham nazoratga olinib, bir necha bor konsiliumlar o‘tkazilgan. Biroq shu soha mutaxassislarining standartlar asosida o‘tkazgan reanimatsion muolajalariga qaramasdan bemor bosh miya qon aylanishining o‘tkir buzilishi, o‘tkir nafas va o‘pka-yurak yetishmovchiligidan vafot etgan.

Avval Toshkentdagi Yakkasaroy tuman tibbiyot birlashmasi shifokorining koronavirusga chalingani, oqibatda miokard infarkti, o‘tkir nafas va yurak qon-tomir yetishmovchiligidan vafot etgani xabar qilingandi.

Endilikda o‘lim holatlari soni 22 taga yetdi. Iyun oyining o‘zida 7 nafar bemor hayotdan ko‘z yumgan.

O‘zbekistonda 28-iyun soat 23:30 holatiga ko‘ra, koronavirus infeksiyasi qayd etilganlar soni 135 nafarga ko‘payib, 7948 nafarni tashkil qilmoqda. 28-iyunda jami 266 ta yangi kasallanish holati (247 tasi karantin muassasalarida, 16 tasi aholi orasida) kuzatildi.

28-iyun kun davomida Toshkentda 67 nafar, Qashqadaryoda 14 nafar bemor koronavirusdan tuzalib, mamlakatda infeksiyadan forig‘ bo‘lganlar soni 5329 nafarga yetgan.