Фарғона вилояти ҳокими Шуҳрат Ғаниев май ойида Сўх туманида бўлиб ўтган воқеаларни «Сўх воқеалари» сифатида талқин қилинишига қаршилигини билдирди. У бу ҳақда 25 июнь, пайшанба куни журналистлар билан бўлиб ўтган очиқ мулоқотда айтиб ўтди, дея хабар берди «Дарё» мухбири Мусулмонбек Иброҳимов.

Фото: «Дарё»

Эслатиб ўтамиз, Ўзбекистон—Қирғизистон чегарасида жойлашган Чашма булоғи олдида 31 май куни икки мамлакат фуқаролари ўртасида зиддият келиб чиққан. Ўзбекистон бош вазири Абдулла Арипов 1 июнь куни воқеа юз берган жойга ташриф буюриб, аҳоли билан учрашган.

Абдулла Арипов Қирғизистон расмийлари билан ҳодиса юзасидан музокара олиб борган. Шу куни Ўзбекистон ва Қирғизистон президентлари мазкур ҳодисани телефон орқали муҳокама қилган. Можаро оқибатида 187 нафар ўзбекистонлик касалхонага ётқизилган, Ўзбекистон томонда учта хонадон ёниб кетган. Қирғизистоннинг Боткен вилоятида эса уй ва омборхонада ёнғин содир бўлган, шунингдек, 25 киши жароҳат олган.

Мазкур воқеалар ортидан Ўзбекистон ҳукумати аъзолари ҳудуддаги муаммоларни ўрганиш учун 2 июнь куни у ерга ташриф буюрган. Сўх туманига янги ҳоким ва ички ишлар бўлимига янги раҳбар тайинланганди.

Мулоқотда Шуҳрат Ғаниев мазкур низолар ҳақида гапирганда уларга «Сўх воқеалари» дея таъриф бермаслик лозимлигини айтиб ўтди.

«Албатта, анклав ҳудуд бўлганидан кейин анклав ҳудуднинг ўзига яраша муаммолари бўлади. Анклав ҳудуд билан ишлаб юрган раҳбар, ишлаб кўрган ходим, ишлаб кўрган бошқа соҳа вакиллари билади. Шунинг учун ‘Сўх воқеалари’ деб талқин қилмаслигингларни илтимос қиламан. Чунки бу ерда икки мамлакат фуқаролари аҳил-иноқ бўлиб минг йиллардан буён яшаб келади. Қўшни Қирғизистон халқи билан дилимиз ҳам, динимиз ҳам, бозоримиз ҳам, мозоримиз ҳам бир — ҳаммамиз бирмиз», — деди у.

Вилоят ҳокими Сўх туманида катта бунёдкорлик ишлари амалга оширилаётганига алоҳида урғу бериб ўтди.

«Июнь ойининг ўзида 2563 та янги иш ўрни яратилди. Туманда жами 390 миллиард сўм сарфланиши белгилаб олинган бўлса, ишлар ойма-ой амалга ошириб келинмоқда. Бундан ташқари қўшимча ер, қўшимча сув захирасини ташкил этиш белгиланган. Қўшимча ер қўшимча иш ўрни дегани. Қўшма корхоналар ташкил қилиш бўйича Ўзбекистон бош вазири раҳбарлигида тузилган ҳукумат ишчи гуруҳи бор. Ишчи гуруҳдаги бош вазир ўринбосарларининг барчаси ўз йўналишлари бўйича туманга амалий ёрдам бериб келмоқда», — деган Ғаниев.