Хоразм вилояти ғаллакорлари давлатга ғалла топшириш режасини ортиғи билан бажарди. Бу ҳақда вилоят ҳокимлиги матбуот хизмати хабар берган.
«Вилоятнинг 1294 та фермер хўжалиги томонидан 33 200 гектар экин майдонига ғалла экилиб, агротехник қоидалар асосида парваришланди.
Давлат хариди учун шартнома асосида жами 92,6 минг тонна, шундан 84,4 минг тонна товар топшириш режалаштирилиб, амалда 86,8 минг тонна дон топширилди ва режа 102,9 фоизга бажарилди», — дейилган хабарда.
Шунингдек, ҳокимлик дон йиғиштириб олинмаган ғаллазорларда ўрим-йиғим ишлари давом этаётганини қайд этган.
Мавзуга доир: Ўзбекистонда ғалланинг гектаридан 20 центнердан кам ҳосил олган фермердан ер олиб қўйилади
2020 йил февраль ойида Ўзбекистонда давлатга мажбурий ғалла сотиш режаси 35 фоизга камайтирилган. Март ойида эса Ўзбекистонда 2020 йилдан пахтага, 2021 йилдан ғаллага давлат хариди нархини белгилаш амалиёти тўлиқ бекор қилиниши ҳақида хабар берилган.
Изоҳ (0)