«Яшил» ҳудуд мақомини сақлаб қолаётган Андижон вилоятида 2020 йил 15 июндан бошлаб 462 та нодавлат мактабгача таълим ташкилоти ўз фаолиятини бошлади. Бу ҳақда «Дарё» мухбири Умиджон Мамарасулов хабар берди.
Андижон вилоят мактабгача таълим бошқармаси ахборот хизматининг маълум қилишича, республика махсус комиссияси қарорига кўра, 15 июндан бошлаб «яшил» ва «сариқ» ҳудудларда мактабгача таълим ташкилотлари фаолиятига рухсат берилган. Шунга асосан, МТТлар фаолияти хавфсизлигини таъминлаш мақсадида барча шароитларни яратиш, жумладан, тарбияланувчиларнинг овқатланишини ташкил этиш учун озиқ-овқатлар, ҳимоя воситаларини сотиб олиш, ўрнатиш ва дезинфекция қилиш ишлари, шунингдек, ходимларни меҳнат таътилидан чақириш бўйича ҳужжатлар расмийлаштириш жараёнлари давом этмоқда.
15 июндан бошлаб шу кунга қадар зарур хавфсизлик чораларини таъминлаб берувчи 462 та хусусий МТТ санитария-гигиена қоидаларига амал қилган ҳолда ўз фаолиятини бошлади ва 13 минг 153 нафар тарбияланувчини бағрига олди.
Эслатиб ўтамиз, Ўзбекистонда 1 июндан «сариқ» ва «яшил» ҳудудларда спорт тўгараклари, фитнес клублар ва спорт заллари фаолиятига рухсат берилган, 2020 йил 4 июнь куни 5 июндан масжидлар, 15 июндан ресторан ва боғчалар очилиши ҳақида Республика махсус комиссиясининг қарори қабул қилинган.
Изоҳ (0)