Uzbekistan Airways компаниясининг Ўзбекистон фуқароларини ватанга қайтариш бўйича Москва шаҳридан амалга оширилаётган чартер рейслари учун чипта нархи 750 долларга кўтарилган. Транспорт вазирлиги ахборот хизмати раҳбари Наврўз Ашурматов 23 июнь куни ўтказилган брифингда нима сабабдан нарх кўтарилганига изоҳ берди.
Унинг сўзларига кўра, хориждан ўзбекистонлик фуқароларни олиб келиш учун ташкиллаштирилаётган чартер рейслар учун дастлаб авиачипталар нархи минимал тарифдан ошмаслиги белгиланган эди.
«Бироқ минимал тариф бўйича белгиланган нархлар чартер рейсларнинг хориж давлатига бориш ва яна Ўзбекистонга қайтиш харажатларига салбий таъсир кўрсатди. Нархлар шундан келиб чиққан ҳолда белгиланган», — деди вазирлик ахборот хизмати раҳбари.
Эслатиб ўтамиз, 13 майдан 24 майгача хориждаги ўзбекистонликларни олиб келиш учун 12 та рейс амалга ошириш белгиланган ва режага асосан амалга оширилганди. 25—31 май кунлари 8 та чартер рейс амалга оширилган ҳамда Россия ва Туркиядан жами 2118 нафар фуқаро Ўзбекистонга олиб келиниши хабар қилинганди.
Шунингдек, 1—7 июнь кунлари хориждаги ўзбекистонликларни олиб келиш учун 9 та чартер қатнови, 8—21 июнь кунлари оралиғида 20 та чартер рейс амалга оширилган.
Республика махсус комиссиясининг қарорига мувофиқ хориждаги фуқароларни Ўзбекистонга олиб келиш учун 2020 йилнинг 22 июнидан 5 июлигача 21 та чартер рейс амалга ошириш режалаштирилган.
Изоҳ (0)