АҚШ президенти Дональд Трамп 2020 йил охирига қадар хорижлик мутахассислар ва уларнинг оила аъзоларига, шунингдек, мавсумий ишчиларга ишчи визаси берилишини тўхтатиб қўйди. Тегишли ҳужжат Оқ уй сайтида эълон қилинган.
«Вақтинчалик ишчиларга кўпинча уларнинг турмуш ўртоқлари ва фарзандлари ҳамроҳлик қилади, шунингдек, уларнинг кўпчилиги америкалик ишчиларга рақобатчи. Одатдаги шароитда вақтинча ишга жойлаштириш борасидаги дастур тўғри ташкил этилса, иқтисодиётга фойда келтириш мумкин. Бироқ коронавирус сабабли юзага келган иқтисодий пасайиш каби фавқулодда ҳолатда айрим иммиграцион бўлмаган виза дастурлари америкалик ишчиларнинг бандлигига ғайриоддий хавфни юзага келтиради», — дейди Трамп.
АҚШ президенти томонидан имзоланган фармон H-1B, H-2B, H-4, L-1 визалари ва J-1 визасининг баъзи турларига тааллуқли бўлади.
H-1B визалари хорижлик малакали ишчилар учун, асосан, технология соҳасида кенг қўлланади. H-2B визалари мавсумий ишчиларга қўлланади. H-4 визалари эса H-1B визалари эгаларининг турмуш ўртоқларига берилади.
Ж-1 визалари олимлар, тадқиқотчиларга; L-1 визалари эса компаниянинг хориждаги бўлимидан АҚШдаги бўлимига кўчирилиб ўтказилувчиларга берилади.
Трамп администрациясининг юқори мартабали амалдорларидан бирининг сўзларига кўра, қабул қилинган чоралар америкаликлар учун 50 мингта иш ўрнини бўшатиб беради.
Эслатиб ўтамиз, март ойининг ўрталарида АҚШда COVID-19 коронавирусининг тарқалиши сабаб Европа мамлакатларидан келувчилар учун 30 кунга вақтинчалик тақиқ ўрнатилган эди. Апрель ойининг охирларида эса Трамп иммигрантларнинг АҚШга кириши икки ойга тўхтатилганини маълум қилган эди.
Изоҳ (0)