Наманганда оилавий можаро оқибатида оғир жароҳат олган опа-сингиллар жонлантириш бўлимидан чиқди. 2010 йилда туғилган Муштарий ва 2012 йилда туғилган Мубина бундан 10 кун аввал бош мия очиқ жароҳатлари билан Республика шошилинч тиббий ёрдам илмий маркази Наманган филиалига келтирилган эди.
«Дарё» мухбири Азизбек Абдувалиевнинг хабар беришича, кома ҳолатида бўлган опа-сингиллар 1,5—2 соат давомида операция қилинган ва уларнинг ҳаёти сақлаб қолинган.
«Улар бугун жонлаштириш бўлимидан болалар жароҳатлари хирургияси бўлимига ўтказилди. Ҳолатларини нисбатан қониқарли деб баҳолаш мумкин. Тан жароҳатларидан ташқари кучли руҳий стресс асоратлари бор, амнезия, яъни хотирани йўқотиш аломатлари кузатилмоқда», — дейди филиал болалар жароҳатлари хирургияси бўлими мудири Шуҳратжон Каримбоев.
Каримбоевга кўра, қизлар бу ерда бир муддат даволанишдан сўнг болалар шифохонаси неврология бўлимига юборилади ва психологлар кузатувида бўлади.
Эслатиб ўтамиз, Наманган шаҳрининг «Янги замин» маҳалласида жорий йил 13 июнь куни рўй берган жанжал оқибатида 44 яшар эркак 36 ёшли турмуш ўртоғининг бош ва бўйин соҳасига болта билан уриб ўлдирганди. Шундан сўнг вояга етмаган фарзандлари — 10 ва 8 ёшли қизлари, шунингдек, 4 ойлик чақалоғига болта билан тан жароҳати етказган ва ўзини ёқиб юборган. Чақалоқ воқеа жойида ҳалок бўлган, икки нафар қиз эса оғир тан жароҳати олганди.
Ҳозирда ушбу ҳодиса юзасидан вилоят прокуратураси томонидан тергов ҳаракатлари олиб борилмоқда.
Изоҳ (0)