Фарғона ИИБ Сўхда республикада ягона бўлган хорижга чиқиш паспортини расмийлаштирувчи сайёр хизматни йўлга қўйди

Сўх аҳолисига қулайлик яратиш мақсадида Фарғона вилояти ИИБ томонидан тажриба тариқасида хорижга чиқиш паспортини расмийлаштириш сайёр хизмати йўлга қўйилди, дея хабар берди «Дарё» мухбири Азизбек Эрматов.

Республикада ягона бўлган мазкур сайёр хизмат тури «Газел» автомашинасига жойлаштирилган бўлиб, малакали мутахассислар ва барча зарур техник қурилмалар билан таъминланган.Ушбу хизмат ногиронлиги бўлган, кекса ёшдаги ҳамда туман марказидан олис ҳудудларда яшовчи фуқаролар учун мўлжалланган.

Қайд этилишича, ҳар куни хорижга чиқиш биометрик паспортини расмийлаштириш бўйича 70 нафарга яқин фуқарога миграция хизмати кўрсатилмоқда.

Эслатиб ўтамиз, аввалроқ ишчи гуруҳ томонидан Сўх туманида олиб борилаётган ишлар тўғрисида маълумот берилганди.