17 июнь куни тонгда Флорида штатининг Уолтон шаҳрида Маршал Батлер исмли уч ёшли бола йўқолиб қолган. Болакай ҳозирда топилган ва аҳволи яхши бўлиб, йўқолиб қолган вақтида унга итлар ғамхўрлик қилган, деб ёзади WЖҲГ канали.
«Биз ваҳимада эдик. Бошимизда энг ёмон сценарийлар айлана бошлади», — дейди болакайнинг холаси Кайла Стюарт. Маршал аутизм билан касаллангани ва гапира олмаслиги вазиятни янада мураккаблаштирган. Болакай йўқолиб қолганида, унинг эгнида фақатгина таглик бўлган.
Маҳаллий полиция Маршални бир неча соат давомида қидирган ва ижтимоий тармоқларда эълонлар жойлаштирган. «Гап ёш болани қидириш ҳақида кетар экан, ҳар бир дақиқа ҳисобда», — дейди полициячи Кори Добридния.
Натижада болакайни оиланинг қўшниси уйдан тахминан 1,6 километр узоқликда топиб олган. Маршал яхши аҳволда бўлган, унинг ёнида оиланинг Гречиха ва Нала лақабли итлари бўлган.
«Иккала ит ҳам унинг ёнида бўлган. Бахтимизга, улар Маршалга ҳамроҳлик қилган. Ўйлашимча, улар болакайнинг хавфсизлигини таъминлаган», — дейди қўшни.
Маршал онасининг сўзларига кўра, итлар «ўз вазифасини бажарган».
«Биз Маршални топганимизда, унинг кайфияти яхши эди. Ўрмон бўйлаб айланиб бироз кир бўлибди, бироқ энг муҳими — унга ҳеч қандай зарар етмаган ва бахтли. Итлар — вафодор жонзотлар. Фикримча, улар бола ёлғиз эканлигини кўриб, унга ёрдам кераклигини тушунган. Инстинктлар иш берган. Улар болакай билан юриб, уни топишгунларича кузатиб келган», — дейилади хабарда.
Изоҳ (0)