Ўзбекистон Ёзувчилар уюшмаси аъзоси Абдуқаҳҳор Иброҳимов вафот этди. Бу ҳақда уюшма ахборот хизмати хабар берди.

Фото: «Kun.uz»

Ёзувчи, драматург, публицист, Ўзбекистон санъат арбоби Абдуқаҳҳор Иброҳимов Тошкентнинг Кўкча даҳасида 1939 йилнинг 16 августида туғилган.

«Ўзбекистон маданияти» газетасида адабий ходим ва бўлим мудири, «Гулистон» журналида масъул котиб, «Ўзбекистон адабиёти ва санъати» газетасида бўлим мудири, Ўзбекистон Маданият вазирлигида рэпертуар-таҳрир ҳайъати бош муҳаррири, Ўзбекистон Президенти девонида консултант ва етакчи консултант, Республика «Маънавият ва маърифат» марказида бош мутахассис бўлиб ишлаган.

Адабий фаолияти 1960 йилларда бошланган. «Қоя остида», «Сўнгги нур», «Осмон яқин, ер юмшоқ» ҳикоялар тўпламлари, «Уйқу келмас кечалар» романи муаллифи.

«Тил — тақдир демак», «Ватан туйғуси» (ҳамкорликда), «Бизким, ўзбеклар» каби бадиий ва сиёсий публицистик асарларида тил, кўҳна миллий давлатчилик тарихи акс эттирилган.

Адибнинг, айниқса, публицист сифатидаги фаолияти эътиборга сазовор. Муаллиф мақолаларида кўтарилган сиёсат, иқтисод ва маънавиятга оид даврнинг долзарб муаммолари кўп ҳолларда ўзининг пухта ечимини топади. Шу туфайли ҳам адибга 1990 йилларда Республика матбуотида эълон қилинган энг яхши публицистик мақолалари учун «Йилнинг энг яхши журналисти» деган махсус диплом берилган. Ёзувчи «Туркистон япроқлари» номли ҳужжатли қиссаси учун «Туркистон—умумий уйимиз» халқаро танловининг ғолиби бўлган.

1999 йилда «Меҳнат шуҳрати» ордени билан мукофотланган.